Babai i Millosh Stojanoviq, që u plagos të premten në Shtërpcë, Zvonimir Stojanoviq, ka thënë se i biri i tij është i tronditur nga ajo që ka ndodhur.
Kosovo-Online, raporton se Stojanoviq për TV Prva ka thënë se e ka vizituar mbrëmë Milloshin, i cili është i shtrirë në spitalin e Graçanicës.
“Ai ndihet mirë, por është dukshëm i tronditur për gjithçka që ka ndodhur. E gjithë kjo është e vështirë për të. Shpresojmë që ai të shërohet sa më shpejt dhe të kthehet në familje.” – tha ai.
Ai ka thënë se “me kalimin e kohës, po bëhet e qartë se çfarë mund të ketë ndodhur”.
“Është jashtëzakonisht e vështirë, ne jemi ende në shok. Me kalimin e kohës po bëhet më e qartë në kokën tonë se çfarë mund të ketë ndodhur.” – tha Stojanoviq.
Ai tutje ka shtuar se ka frikë për sigurinë e familjes së tij, por “shpreson që diçka e tillë mos t’i ndodhë askujt”.
“Nuk e prisja që diçka e tillë të ndodhte ditën e Krishtlindjes. Do të doja që diçka e tillë të mos i ndodhte më kurrë, askujt.” – përfundoi ai.
