Në fshatin Gushavc të Mitrovicës, i cili gjendet matanë lumit Ibër, është mbajtur tubimi i banorëve të kësaj zone kundër themelimit të Asociacionit të komunave me shumicë serbe.
Në këtë tubim u kërkua nga Qeveria e Kosovës që të mos lejoj themelimin e Asociacionit të komunave me shumicë serbe, duke thënë se ky Asociacion do ta bëjë jofunksional shtetin e Kosovës dhe do të krijoj mundësi për ndarjen e Kosovës, raporton Veriu info.
Në këtë tubim foli ish kryetari i Mitrovicës, Agim Bahtiri, vendlindja e të cilit është në këtë fshat. Ai tha se Asociacioni i komunave me shumicë serbe do të jetë “tumor” për funksionimin e shtetit të Kosovës.
“Serbia po kërkon ndarjen e Kosovës dhe paralizimin e funksionimit të saj përmes themelimit të Asociacionit. Ne e falenderojmë bashkësinë ndërkombëtare që na ka ndihmuar për t’u çlimuar nga Serbia gjenocidiale dhe na ka ndihmuar për krijimin e shtetit, sidomos ShBA-ja. Por tash është koha që të na përkrahin prapë, se jemi në drejt tonë. Kërkoj nga Qeveria dhe gjitha partitë politike që të bëhen bashkë dhe ta ndihmojnë Kosovën. Ne nuk jemi kundër serbëve dhe drejtave të tyre, por jemi kundër atyre që duan jofunksionalitetin e shtetit të Kosovës. Askush nuk duhet bërë presion mbi Qeverinë e Kosovës për krijimin e këtij Asociacioni, sepse kjo do ta bosnjizoj Kosovën”, deklaroi Bahtiri.
Ish kryetari i Mitrovicës tha se kjo iniciativë kundërshtuese nuk do te ndalet këtu, por do te vazhdohet tutje nëse insistohet në themelimit te Asociacionit të komunave me shumicë serbe.
Ai iu bëri apel gjithë liderëve të partive politike që të mos shkelin mbi gjakun e dëshmorëve.
Para të pranishmëve foli edhe Nazmi Beka, përfaqësues i fshatit Gushavc, i cili tha se ky tubim ka për qëllim kundërshtimin e planeve për coptimin e Kosovës.
“Ne që jetojmë në fshatrat e Luginës së Ibrit ndihemi të rrezikuar prej këtyre planeve dhe i kundërshtojmë ashpër. Në këtë
moment të rëndësishëm për historinë e Kosovës jemi mbledhur që të tregojmë se jemi kundër themelimit të Asociacionit të komunave me shumicë serbe, i cili është një bosnjizim për shtetin e Kosovës”, tha Beka.
