Raportimi i para disa javësh nga Gazeta Online Veriu.info për shkarkimin e kundërligjshëm të nënkryetarit për komunitete të komunës së Mitrovicës nga Kuvendi Komunal, u konfirmua sot përmes një përgjigje me shkrim nga Ministria e Administrimit të Pushtetit Lokal, institucion ky që vlerëson ligjshmërinë e vendimeve të kuvendeve komunale.
Për këtë çështje u deklarua për Gazetën Online Veriu.info drejtori i AVONET, Kenan Gashi, i cili ka thënë se nga monitorimi që i ka bërë komunës së Ferizajit dhe komunave tjera ka hasur në një sërë rastesh kur kuvendet komunale kanë marrë vendime në kundërshtim me ligjin, madje sipas tij është një model shqetësues i shkeljeve procedurale që po përsëriten.
“ Nga përvoja ime personale në monitorimin e qeverisjes lokale, jo vetëm në Komunën e Ferizajt, por edhe në Shtime dhe komuna të tjera, kam hasur në një sërë rastesh kur kuvendet komunale kanë marrë vendime në kundërshtim me ligjin. Ky nuk është një rast i izoluar, por pjesë e një modeli shqetësues të shkeljeve procedurale që po përsëriten. Megjithatë, unë nuk besoj se kemi të bëjmë me një tendencë të qëllimshme apo të organizuar për të shkelur ligjin , më tepër duket si mungesë e kapaciteteve juridike dhe moskujdes në respektimin e procedurave. Kjo situatë e thekson edhe më shumë nevojën për rritjen e transparencës, llogaridhënies dhe ndihmës profesionale për kuvendet komunale në zbatimin korrekt të ligjit.” – tha Gashi për Veriu.info.
Sipas tij Kuvendi Komunal i Ferizajit duhet ta shfuqizojë vendimin dhe ta kthej procesin në pikën zero.
Kurse për çështjen nëse nënkryetari i emëruar kundërligjshëm, Qazim Rrahmani, duhet t’i kthejë pagat e marra, Gashi ka thënë se Ligjet në fuqi, përfshirë Ligjin për Pagat në Sektorin Publik, Ligjin për Zyrtarët Publik dhe Ligjin për Menaxhimin e Financave Publike, nuk përmbajnë dispozita të qarta që e obligojnë kthimin e pagave në raste të emërimeve të paligjshme.
Sipas Gashit nëse merret parasysh parimi i pasurimit të padrejtë atëherë Rrahmani detyrohet t’i kthejë mjetet e marra si paga gjatë kësaj periudhe.
“ Megjithatë, duhet të merret parasysh edhe parimi i mirëbesimit, i cili në të drejtën administrative ka rol mbrojtës për palët që përfitojnë nga një akt i kundërligjshëm pa qenë në dijeni të paligjshmërisë. Në rastin e Qazim Rrahmanit, nuk ka prova që ai ka vepruar me qëllim të keq ose në dijeni për mungesën e ligjshmërisë së emërimit të tij. Ai është emëruar nga një vendim formal i Kuvendit Komunal dhe ka ushtruar detyrën në përputhje me këtë vendim, duke përmbushur funksionet publike të pozicionit të tij. Për më tepër, nëse vetë Kryesuesi deklaron se nuk ka qenë në dijeni të kundërligjshmërisë së vendimit, atëherë njëjtë mund të vlejë edhe për të emëruarin. Kësisoj sipas nenit 55 paragrafi 3 i Ligjit Nr. 05/L-031, në mungesë të qëllimit të keq dhe me veprim në bazë të një vendimi zyrtar, Qazim Rrahmani mund të konsiderohet se ka vepruar me mirëbesim, dhe si rrjedhojë, nuk do të duhej të detyrohej të kthejë pagat e marra.” – përfundon deklarimi i Gashit për Veriu.info.
