Zgjedhjet parlamentare në Republikën e Kosovës u mbajtën më 9 shkurt, por katër muaj më vonë, vendi vazhdon të jetë pa qeveri dhe pa kryetar Kuvendi.
Më 2 qershor, dështoi përpjekja e 25-të për formimin e një qeverie të re — një fakt që sipas gazetës ukrainase European Pravda, dëshmon për thellimin e krizës politike në shtetin më të ri të Evropës.
Që prej zgjedhjeve, deputetët e rinj mblidhen çdo 48 orë në përpjekje për të zgjedhur udhëheqësinë e re institucionale, por pa sukses.
Si rezultat, Kosova ndodhet në një bllokadë të zgjatur politike, pa ndonjë rrugëdalje të qartë në horizont.
Sipas European Pravda, edhe pse Lëvizja Vetëvendosje e kryeministrit në detyrë Albin Kurti doli partia e parë në zgjedhje, ajo humbi terren krahasuar me rezultatin e mëparshëm, duke siguruar vetëm 48 ulëse — dhjetë më pak se në zgjedhjet e fundit.
Ky rezultat është i pamjaftueshëm për formimin e një shumice në Kuvendin 120-anëtarësh, ndërsa krijimi i një koalicioni ka rezultuar i pamundur.
Krizës i shtohet edhe fakti se opozita është e vendosur të largojë Kurtin nga pushteti, por vetë nuk ka numrat për të formuar një qeveri. Përplasja mes këtyre dy kampeve politike ka bllokuar çdo përpjekje për normalizimin institucional.
Gazeta ukrainase thekson se Kurti dhe Vetëvendosje përfaqësojnë një brez të ri politikanësh, që kanë sfiduar trashëgiminë e elitave të vjetra të luftës.
Por kjo ka sjellë edhe përplasje të forta me aleatët tradicionalë të Kosovës, sidomos për shkak të qasjes së ashpër të Kurtit ndaj veriut të vendit dhe minoritetit serb.
Në përpjekje për të shtrirë kontrollin e plotë të Prishtinës mbi veriun me shumicë serbe, Kurti ka acaruar raportet me BE-në dhe SHBA-në. Sanksionet e vendosura nga BE-ja ndaj Kosovës, ndërkohë që Serbia nuk u përball me pasoja, e kanë rritur ndjeshëm tensionin politik të brendshëm.
Sipas European Pravda, opozita kosovare e sheh këtë përballje me Perëndimin si të rrezikshme për të ardhmen e vendit, duke pasur parasysh sfidat ekzistuese si varfëria, korrupsioni dhe krimi i organizuar.
Një tjetër faktor që e ndërlikon situatën është fakti se 10 vende në Kuvend janë të rezervuara për minoritetet, shumica prej tyre të zëna nga Lista Serbe — një parti e afërt me presidentin serb Aleksandar Vuçiq.
Kjo i jep Beogradit një ndikim të drejtpërdrejtë në politikën e brendshme të Kosovës dhe, sipas gazetës, kontribuon në destabilitetin aktual.
Ndërkohë, presidentja e Kosovës, Vjosa Osmani, nuk ka ndërmarrë hapin për shpërndarjen e Kuvendit dhe mbajtjen e zgjedhjeve të reja, duke pasur parasysh se një cikël tjetër zgjedhor mund ta thellojë edhe më shumë krizën.
Integrimi në BE në udhëkryq
Kosova përballet me një udhëkryq të vështirë në rrugën e saj drejt integrimit europian.
European Pravda thekson se pengesa kryesore për këtë mbetet normalizimi i marrëdhënieve me Serbinë, bisedime që u ndërprenë pas sulmit të armatosur të vitit 2023 në fshatin Banjskë.
Në sfondin e kësaj situate, figura si Richard Grenell — ish-emisari i posaçëm amerikan gjatë administratës Trump dhe mik i ngushtë i Vuçiqit — vazhdojnë të kenë ndikim të konsiderueshëm, shpesh duke mbajtur një qëndrim të ashpër ndaj qeverisë së Kosovës.
European Pravda e përshkruan situatën aktuale në Kosovë si një krizë të shumëfishtë: institucionale, politike, ekonomike dhe diplomatike. Dhe zgjidhja e saj mbetet ende larg.
