Skuadra e Dritës do të luajë ndaj kampionit të Rumanisë, FCSB në raundin e tretë të kualifikimeve të Europa League, pasi ekipi rumun u mposht nga Shkëndija në kualifikueset e Champions League, e Drita pësoi disfatë nga Copenhagen.
Gazetari i njohur rumun, Ovidiu Ioanitoaia tha se FCSB assesi nuk duhet ta nënçmojë Dritën, ashtu siç bëri me Shkëndijën.
“Tani vjen Drita. Përsëri duhet të jemi vigjilentë. Bëhet fjalë për kampionin e Kosovës. Është e vërtetë, e dimë mirë që kosovarët janë në të gjithë Evropën, ka më pak prej tyre që kanë mbetur në shtëpi, por Drita është gjithashtu një kundërshtare që nuk duhet parë me përçmim, siç bëmë me Shkendijën”, tha Ovidiu Ioanitoaia për GSP.ro.
“Ne jemi favoritë, por të gjithë na mposhtin dhe diçka po ndodh në FCSB. Të mos harrojmë se ata humbën edhe ndeshjen e kampionatit kundër Farul. Kanë katër humbje, njëra pas tjetrës”, përfundoi ai.
Ndeshja e parë luhet në Rumani me 7 gusht, kurse ajo e kthimit me 14 gusht në kryeqytet.
