Në gjykimin ndaj Hashim Thaçit, Kadri Veselit, Rexhep Selimit dhe Jakup Krasniqit, ka filluar dëshminë sot(e marte) dëshmitari i 24-të (me kodin 4255), për të cilin nga ana e Zyrës së Prokurorit të Specializuar (ZPS) u tha se ka qenë komandat i Ushtrisë Çlirimtare të Kosovës(UÇK) për një periudhë të caktuar kohore dhe se ishte edhe anëtar i Lidhjes Demokratike të Kosovës(LDK).
Ben Emmerson, avokat i Kadri Veselit, ka filluar marrjen në pyetje duke ia lexuar dëshmitarit një pjesë nga intervista e tij dhënë Prokurorisë së Specializuar.
Në këtë intervistë, ai kishte thënë se gjatë luftës nuk e ka njohur dhe nuk ka dëgjuar ndonjëherë për Kadri Veselin.
“Eshtë një pyetje: Në këtë periudhë, a e ke parë, a e ke njohur Kadri Veselin – në ‘98, ’99? Ju jeni përgjigjur: ‘Atë s’e ka njohur askush’.
Pyetje: Gjatë konfliktit, a ke dëgjuar ndonjëherë për të?
Përgjigje: ‘Jo asnjëherë’”.
Të njëjtën gjë dëshmitari e konfirmoi edhe në seancën e pasdites.
“Kadri Veselin nuk e kam njohur më parë, deri pas luftës kur ka pasur pozita publike”, ka thënë dëshmitari i 24-të me kodin 4255.
Dëshmia e tij në ditën e parë ka vazhduar në seancë të mbyllur për publikun.
