Një incident i rëndë me rrezikshmëri të lartë është raportuar mbrëmjen e 30 qershorit në qytetin e Mitrovicës së Jugut, ku dy persona – babë e bir – janë përfshirë në një konflikt që ka përfunduar me rrahje dhe përdorim armësh zjarri në një zonë të populluar.
Burime të sigurta të Gazetës Sinjali bëjnë me dije se ngjarja ka ndodhur rreth orës 20:00, pranë tunelit të parë afër shkollës në rrugën “Nystret Musa”, ku është raportuar një përleshje fizike dhe të shtëna me armë zjarri.
Njësitet policore kanë ndërhyrë menjëherë dhe gjatë kontrollit në vendngjarje, tek i dyshuari E.F. 23-vjeçar është gjetur një pistoletë me kalibër 9x19mm, me 2 karikatorë dhe 20 fishekë, si dhe leja e armës. Po ashtu, tek I.F., 63-vjeçar janë gjetur një thikë dhe një armë automatike AK-47 me 26 fishekë kalibër 7.62x39mm.
Policia ka vazhduar me bastisje në shtëpinë e të dyshuarve, ku janë sekuestruar: 1 pushkë gjuetie, 10 fishekë kalibër 12GA, pajisje pastruese për armë, 1 kafekë pistolete me gaz (e dëmtuar), 59 fishekë kal. 9x19mm, 15 fishekë kal. 7.62x39mm, 5 fishekë kal. 5.56mm.
Të gjitha këto armë e municione janë gjetur në pronësi të E.F. dhe I.F., të cilët janë intervistuar në cilësinë e të dyshuarve.
Përkundër deklarimeve për të shtëna, në vendngjarje nuk janë gjetur gëzhoja, sipas njësisë së Forenzikës që ka dalë në vendin e ngjarjes.
Me urdhër të Prokurorit kujdestar, ndaj të dyshuarve është caktuar masa e ndalimit për 48 orë, ndërsa rasti është iniciuar për “Mbajtje në pronësi, kontroll ose posedim të paautorizuar të armëve”, “Përdorim i armës” dhe “Shkaktim i rrezikut të përgjithshëm”.
Rasti mbetet në hetim.
