Edhe Vuçiqi vetë e di…se e vetja mundësi tash për tash është kthimi i gjyqtarëve dhe prokurorëve serbë në instuticionet e Kosovës.
Kështu vlerësoi Drejtori i Institutit serb për Zhvillim Ekonomik Territorial (inTER), Dragisha Mijaçiq rreth të ashtuquajturave “masa ndaj/për Kosovën” që u paraqitën teatralisht nga Presidenti i Serbisë, Aleksandar Vuçiq, në “përgjigjen serioze” që kishte lajmëruar ta plasonte “brenda 72 orësh”.
Në një seri kërkesash për kthimin e gjendjes së status quos së para dy viteve në veri, Vuçiq kërkoi gjithçka që kishte urdhëruar vetë serbët që të hiqnin dorë: zgjedhje në veri, kthim të serbëve në polici, gjyqësi, prokurori, themelim të Asociacionit etj.
“Veç sa për të kënaqur publikun serb”, tha Dragisha Mijaçiq, ndërsa të vetmen kërkesë realiste e pa kthimin e gjyqtarëve dhe prokurorëve serbë, dorëheqjet e të cilëve s’ishin formalizuar asokohe nga institucionet kosovare.
“Nga të githa masat në këtë pikë, ka mundësi të rikthehen prokurorët dhe gjyqtarët në sistemin e Kosovës, gjë që mund të pritet së shpejti, dhe kaq merr fund ky tregim; sepse është jo realiste të përmbushen pikat tjera: as organizimi i zgjedhjeve, as për policinë, Asociacioni apo lirimi i të arrestuarve”, tha Mijaçiq, siç e citoi “KoSSeV”.
Ehat Miftaraj nga Instituti i Kosovës për Drejtësi thotë që deklarime dhe kërkesat t e Vuçiqit janë “gënjeshtra të mëdha për përdorim të brendshëm” derisa rikujton që Këshilli Gjyqësor i Kosovës dhe Këshilli Prokurorial i Kosovës “e kanë lënë të hapur mundësinë e kthimit” të gjyqtarëve dhe prokurorëve.
”KGJK dhe KPK e kane lënë të hapur mundësine e kthimit të gjyqtarëve dhe prokurorëve serbë. Si KGJK ashtu edhe KPK mjaftueshëm kanë zgjatur afatin pritjes së gjyqtarëve, prokurorëve dhe stafit mbeshtetës për t’u kthyer në vendet e tyre të punës. Kërkesa apo deklaratat e Vuciqit për kthimin e tyre më shumë është gënjeshter e madhe për përdorim të brendshëm në Serbi se sa kerkesë për Kosovën”, tha Miftaraj për Nacionale.
”Sikurse, KGJK dhe KPK duhet të sigurohen të kthehen vetëm ata gjykatës, prokurorë dhe staf mbështetës që nuk kanë marrë pjesë në manifestime politike dhe në protestat e dhunshme që kanë ndodhur në vitet e fundit në pjesën veriore të Kosovës”, përfundoi Ehat Miftaraj.
Ministrja e Drejtësisë, Albulena Haxhiu, eventualitetin e kthimit të gjyqtarëve dhe prokurorëve serbë të dorëhequr në nëntorin e vitit 2022, e kishte quajtur “tallje me institucionet..që s’duhet të pranohet”.
“E konsideroj që është e papranueshëm që gjyqtarët dhe prokurorët serbë që dorëhiqen apo policët në anën tjetër të pranohen të kthehen në institucione sepse kjo është tallje me institucionet e Republikës, si e tillë nuk duhet të pranohet”, ishte shprehur vitin e kaluar Albulena Haxhiu.
Haxhiu kërkonte nga KPK dhe KGJK që të hapin mundësitë për prokurorë dhe gjyqtarë të rinj serbë në veri, ndërsa shtoi se “sipas informata që unë posedoj po bënë përpjekje për të kryer detyrat e tyre në këtë drejtim”.
“Sa i përket ri funksionalizimit të Gjykatave apo Prokurorive në Veri, siç jeni në dijeni edhe Gjykatat edhe Prokuroria funksionojnë në Veriun e vendit tonë, situata është vështirësuar prej momentit kur janë dorëhequr gjyqtarët dhe prokurorët serbë”, shprehej Haxhiu.
