Qindra qytetarë nga të gjitha anët e Kosovës, nga rajoni dhe diaspora, janë mbledhur sot në qendër të Prishtinës për të protestuar kundër, siç po e quajnë ata, padrejtësive të Gjykatës Speciale në Hagë dhe në mbështetje të ish-krerëve të UÇK-së që po mbahen në paraburgim.
Protesta, që po mbahet në sheshin “Skënderbeu”, është organizuar nga kategoritë e dala nga lufta e UÇK-së. Në këtë tubim, me theks të veçantë është përmendur përpjekja për të mbrojtur dinjitetin e luftës çlirimtare dhe për të kundërshtuar atë që po shihet si përpjekje për ta shtrembëruar historinë.
Ish-kryetari i OVL-UÇK-së, Hysni Gucati, në adresimin para qytetarëve, akuzoi Gjykatën Speciale për deformim të historisë së Kosovës.
“Sot, veteranët e UÇK-së i keni bërë shumë krenarë që jeni bashkuar kundër një gjykate anti-shtetit të Kosovës. Ne e kemi ditur se do të jemi bashkë gjithmonë kur rrezikohet dinjiteti ynë. Gjykata Speciale po deformon historinë tonë”, deklaroi Gucati.
Ai theksoi se kjo gjykatë po gjykon figurat kyçe të luftës së UÇK-së, të cilët ishin aleatë të NATO-s gjatë luftës në Kosovë.
“E vërteta është krejt tjetër. Kjo gjykatë po i gjykon aleatët e NATO-s, Hashimin, Kadrin, Jakupin dhe Rexhepin”, tha ai.
Duke vazhduar me kritika të ashpra ndaj Speciales, Gucati e cilësoi atë si një institucion që po i shërben interesave të Serbisë.
“Nuk ka gjykatë në botë që mund ta zhbëjë të vërtetën historike. Kjo gjykatë me përzgjedhje selektive, vetëm për krimet e shqiptarëve, po synon ta përmbys historinë e Serbisë. Ajo po tenton të krijojë narrativen e rreme sikur Kosova ishte çliruar nga kriminelët. Ushtria Çlirimtare e Kosovës bashkë me NATO-n e kanë çliruar Kosovën nga kriminelët serbë. Kjo nuk është drejtësi, kjo është dhunë politike. Ky është kriminalizim i UÇK-së”, ka thënë Gucati.
