Analisti Halil Matoshi ka kritikuar ashpër kryeministrin në detyrë Albin Kurtin, duke thënë se ai synon një opozitë të nënshtruar.
Sipas Matoshit, Kurti po synon sigurimin e dy të tretave në Kuvend për ndryshime kushtetuese, ndërsa ka paralajmëruar se mbështetja për LVV-në do të bie në zgjedhjet e ardhshme.
“Albin Kurti tha para Kuvendit të Kosovës, pak çaste para shpërbërjes së tij, se nuk e dëshiron opozitën në Kuvend. Pra, ai synon një opozitë që nënshtrohet, jo një opozitë që kontrollon dhe mban përgjegjës pushtetin. Sipas këtij qëndrimi, Kurti po synon arritjen e dy të tretave në Kuvend, ndryshimin e Kushtetutës dhe vendosjen e një diktature kombëtariste të së majtës”, thotë Matoshi,
Ai ka renditur pesë faktorë që, sipas tij, do të ndikojnë në rënien e përqindjes së VV-së, përfshirë rikthimin e Vjosa Osmani në listën e LDK-së, mosangazhimin masiv të mërgatës në votime, kandidimin e Ardian Gjini nga AAK-ja, garën e PSD-së dhe pakënaqësitë ndaj qeverisjes së Kurtit.
“Pesë faktorë flasin se përqindja e VV-së do të bie: E para, në zgjedhjet e shtatë qershorit do ta ketë përballë një brutale në politikë, siç është Vjosa Osmani e zemëruar, e cila do të garojë në listën e LDK-së; së dyti, mërgata kosovare nuk do të mund të vijë masivisht për të votuar; e treta, bartës i listës së AAK-së do të jetë një politikan i së djathtës i kalibrit të lartë, Ardian Gjini; e katërta, në garë do ta ketë edhe grupimin politik PSD, që ka dalë nga bërthama e VV-së; dhe e pesta, keqqeverisja, përkatësisht refuzimi i Albin Kurti për t’i dhënë vendit institucione stabile, ndonëse me 51.1% të votave. Pra, refuzimi për të marrë përgjegjësitë që ia ka dhënë sovrani. Qytetari do ta pyesë veten: “Athua pse nuk po qeveris ky njeri dhe a ka qëllime të fshehta?””, tha Matoshi për GazetaBlic.
