Lideri i AAK-së, Ramush Haradinaj ka thënë se meritat e qeverisë për projektin e Parkut të Erës në Mitrovicë janë zero.
“Kryetari i Qeverisë sot paska marrë pjesë në inaugurimin e Parkut të Erës në Mitrovicë, një investim i jashtëzakonshëm i Kosovës me vendet mike, që është një lajm fantastik, sado që meritat e kësaj qeverie për këtë projekt janë zero”, ka shkruar Haradinaj në Facebook.
Tutje Haradinaj ka thënë se sikur qeveria e Albin Kurtit mos ta kishte kundërshtuar projektin e termocentralit të ri me Countur Global si dhe projektin e gazsjellësit amerikan Shkup-Prishtinë sot Kosova nuk do t’i vuante pasojat e mungesës së energjisë elektrike dhe çmimet stratosferike.
“Sikur ky kryeministër e kjo qeveri të mos e kishin kundërshtuar projektin e termocentralit të ri me Countur Global, apo projektin e gazsjellësit amerikan Shkup-Prishtinë, sot do të mund t’u gëzoheshim edhe dy sukseseve të jashtëzakonshme në fushën e energjisë, e nuk do t’i vuanim pasojat e mungesës së energjisë e çmimeve stratosferike”.
Tutje ai ka thënë se Qeveria aktuale duhet të marrë shembull nga Parku i Erës në Mitrovicë se si duhet të kryhen punët të cilat janë në interes të vendit e pse jo t’i thoshte edhe disa fjalë të mira për Qeverinë Haradinaj e cila për vizion kishte zgjidhjen e situatës elektro-energjike në Kosovë.
“Qeveria duhet të marrë shembull nga Parku i Erës në Mitrovicë, se si nisen e kryhen punët e interesit strategjik për vendin, e pse jo t’i thoshte disa fjalë të mira edhe për Qeverinë Haradinaj, që kishte vizion të qartë se si zgjidhej situata elektro-energjetike në vend”, ka shkruar Haradinaj.
Krejt në fund ai ka thënë se projektet në fushën e energjisë janë të ndalura nga Kryeministri Kurti.
“Sidoqoftë ky është sukses i Kosovës, e cila ka nevojë urgjente që t’i shtyjë edhe projektet tjera në fushën e energjisë, që sot janë ndalur nga Kryeministri Kurti”, ka përfunduar ai.
Annalena Baerbock, ditën e dytë të qëndrimit të saj në Republikën e Kosovës, bashkë me kryeministrin Kurti kanë bërë përurimin e parkut të ri të erës “Selac Windpark” në fshatrat Selac dhe Bajgorë të Komunës së Mitrovicës.
