Lideri i Aleancës për Ardhmërinë e Kosovës, Ramush Haradinaj ka udhëtuar për në Shtetet e Bashkuara të Amerikës.
Kjo është bërë e ditur nga vetë Haradinaj, përmes një publikimi në Facebook.
Haradinaj tha se sot po e nis një javë të vizitës së tij në Uashington, ku do të qëndrojë për të marrë pjesë në ceremoninë “Lutjet e Mëngjesit”.
Ai gjithashtu theksoi se gjatë kësaj vizite, do të zhvillojë edhe takime në Departamentin e Shtetit, Senat dhe në Kongres.
Haradinaj po ashtu tha se Kosova asnjëherë nuk duhet të harrojë që aleanca me Shtetet e Bashkuara të Amerikës është e përjetshme.
Ndryshe për në Amerikë tashmë ka udhëtuar edhe kryetari i Partisë Demokratike të Kosovës, Memli Krasniqi.
Edhe pse në kuadër të “Lutjeve të Mëngjesit” pritej të shkonin edhe emra të tjerë të rëndësishëm të sferës politike në vend, ende nuk ka konfirmim nëse në Shtetet e Bashkuara të Amerikës do të jenë edhe krerët institucional, në mesin e tyre edhe vetë kryeministri Albin Kurti.
Nga Qeveria, Presidenca apo Kuvendi i Kosovës nuk ka pasur ende asnjë konfirmim se kush nga drejtuesit institucional do të jetë në Amerikë, për “Lutjet e Mëngjesit”.
Postimi i plotë nga Haradinaj:
Sot, po e nisi një javë të vizitës sime në Uashington, ku do të qëndroj dhe do të marrë pjesë në ceremoninë “Lutjet e Mëngjesit”. Gjatë kësaj vizite do të kem një agjendë e cila do të përfshijë takime në Departamentin e Shtetit, Senat dhe Kongres, e po ashtu edhe takime tjera me institucione të rëndësishme.
Ndjenjë e veçantë të takoj miqtë e vjetër të Kosovës, znj. Nancy Y. Bekavac, anëtare e Bordit të Universitetit Amerikan (AUK) dhe Shaun Burns, të cilët kanë qenë dhe vazhdojnë të jenë zëri ynë në Amerikë. Me këtë rast, i falënderova për gjithë kontributin e tyre që kanë dhënë me dekada, në veçanti për miqësinë dhe besimin e tyre në Kosovë.
Kosova asnjëherë nuk duhet të harrojë që aleanca me ShBA-të është e përjetshme dhe duhet të mirëmbahet me punë, komunikim të sinqertë dhe bashkëpunim të vërtetë. 🇽🇰 🇺🇲./Lajmi.net/
