Komisioni i Pavarur i Mediave (KPM) ka nisur analizimin e rastit të transmetimit në Tëvë1, ku gjatë një emisioni është shfaqur një hartë në të cilën Kosova paraqitej si pjesë e Serbisë.
Në një përgjigje për Gazetën Online Reporteri.net, KPM ka bërë të ditur se nuk ka pranuar asnjë ankesë nga qytetarët lidhur me këtë rast, por pas kërkesës për sqarim nga Reporteri.net ka nisur shqyrtimin e materialit të transmetuar.
“KPM, deri në kohën e parashtrimit të këtyre pyetjeve nuk ka pasur asnjë informacion ose indikacion në lidhje me këtë çështje. Pas pranimit të këtyre pyetjeve jemi duke analizuar rastin me qëllim të vlerësimit të pajtueshmërisë së përmbajtjes së transmetuar me legjislacionin dhe aktet nënligjore në fuqi”, ka deklaruar KPM.
Institucioni përgjegjës për rregullimin e mediave ka thënë se aktualisht nuk mund të përcaktojë nëse shfaqja e hartës përbën shkelje të Kodit të Etikës apo kushteve të licencës së transmetuesit, pasi sipas tij nevojitet analizë e plotë e materialit dhe rrethanave të rastit.
“Vlerësimi nëse ka pasur shkelje bëhet vetëm pas analizimit të plotë të materialit të transmetuar, rrethanave të rastit dhe deklarimeve të palëve përkatëse”, ka thënë KPM.
KPM ka rikujtuar se transmetuesit televizivë mbajnë përgjegjësi editoriale për të gjitha përmbajtjet që transmetojnë, përfshirë edhe materialet grafike dhe hartat.
“Transmetuesit janë të obliguar të ushtrojnë kujdes profesional në verifikimin dhe publikimin e përmbajtjeve, duke respektuar standardet profesionale dhe dispozitat e legjislacionit në fuqi”, thuhet në përgjigjen e KPM-së.
Sipas KPM-së, nëse pas përfundimit të procedurës konstatohet shkelje, ndaj transmetuesit mund të shqiptohen masat e parapara me nenin 30 të Ligjit për Komisionin e Pavarur të Mediave.
Në bazë të këtij neni, KPM mund t’i lëshojë transmetuesit vërejtje me shkrim ose të shqiptojë një apo më shumë sanksione, përfshirë urdhërimin që subjekti i licencuar të transmetojë publikisht detajet e natyrës dhe shkallës së shkeljes, të kërkojë transmetimin e një korrigjimi apo faljeje, si dhe të vendosë gjobë nga 1 mijë deri në 100 mijë euro.
Masat e tjera që mund të ndërmerren nga KPM përfshijnë pezullimin e një pjese ose të gjithë programit të transmetuesit për një periudhë të caktuar, ndryshimin e kushteve të licencës, si dhe ndërprerjen ose refuzimin e vazhdimit të licencës së transmetimit.
Vendimet për sanksione, sipas ligjit, publikohen nga KPM-ja, ndërsa zbatimi i tyre bëhet në përputhje me procedurat ligjore në fuqi.
Sa i përket kontaktimit të Tëvë1 për sqarime, KPM ka bërë të ditur se procedura administrative është ende duke u zhvilluar dhe se pas verifikimeve fillestare, nëse plotësohen kushtet ligjore, do të ndërmerren hapat e mëtejshëm.
KPM ka theksuar se çdo rast vlerësohet individualisht dhe se transmetuesit kanë obligim që përmbajtjet e tyre të jenë të sakta, të verifikuara dhe në përputhje me standardet profesionale.
KPM ka konfirmuar për Gazeta Online Reporteri.net se pas përfundimit të shqyrtimit do ta bëjë publik qëndrimin ose vendimin përfundimtar lidhur me këtë rast.
