Deputeti i PDK-së, Bekim Haxhiu thotë se kryeministri Albin Kurti duhej të ishte në seancën e sotme të Kuvendit për të dhënë përgjegjësi për dështimin në shëndetësi.
Ai thotë se nuk ka llogari nga qeveria as kur shtatzëna vritet para Gjinekologjisë, as kur gjymtohet trupi i foshnjës së vdekur në lavatriqen e Spitalit të Pejës, as kur digjet pacienti në Klinikën e Psikiatrisë.
“A ka çështje më të rëndësishme për qeverinë e deputetët sesa shëndeti i qytetarëve. Sot në këtë debat duhej të ishte kryeministri Albin Kurti i cili më 14 shtator 2022 themeloi komitetin ekzekutiv për shëndetësi sepse deklaronte se është pak që me e ndreq shëndetësinë tonë veç një ministër.
Sot Kurti duhej të ishte në këtë debat për të dhënë përgjegjësi për dështimin në shëndetësi, edhe si kryeministër edhe si kryetar i komitetit ekzekutiv për shëndetësi.
Kurti sot do duhej të jep llogari për degradimin e sistemit shëndetësor, pabarazinë, pakënaqësinë e pacientëve dhe profesionistëve shëndetësor. Njëri nga ata sot është në grevë urie tani e tri ditë. Qeveria e ministria nuk brengosen për kërkesat e shëndetin e tyre.
Skandale e hajni pa dhënë askush llogari, as kur shtatzëna vritet para Gjinekologjisë. As kur gjymtohet trupi i foshnjës së vdekur në lavatriqen e Spitalit të Pejës, as kur digjet pacienti në Klinikën e Psikiatrisë”, tha Haxhiu.
