Kryetarja e Kuvendit të Republikës së Kosovës, Albulena Haxhiu, u ka bërë thirrje shqiptarëve të Preshevës, Medvegjës dhe Bujanocit që në zgjedhjet e nesërme të dalin në votime dhe të mbështesin “Koalicionin Shqiptar”, me numër 17.
Përmes një postimi, Haxhiu e ka cilësuar ditë të rëndësishme për Luginën e Preshevës ditën e zgjedhjeve, duke theksuar se partitë shqiptare kanë vendosur të garojnë së bashku me një listë të vetme.
Ajo u ka bërë thirrje edhe shqiptarëve që jetojnë dhe punojnë në Kosovë, por që kanë të drejtë vote, që të udhëtojnë drejt Luginës dhe të marrin pjesë në procesin zgjedhor.
Haxhiu ka theksuar se Kosova i përcjell me vëmendje zhvillimet në Luginë, duke vënë në pah rëndësinë e përfaqësimit politik të shqiptarëve, mbrojtjes së të drejtave të tyre dhe ngritjes së zërit kundër padrejtësive.
“Nesër, zëri i Luginës dëgjohet përmes fletëvotimit, me votën për numrin 17, ‘Koalicionin Shqiptar’.
Luginë, Kosova është me ty!” shkroi Haxhiu.
