Hoxha Osman Musliu, ka reaguar në Facebook pas lajmeve se Gjykata Themelore në Prizren ka caktuar masën e paraburgimit prej një muaji për personin që sulmoi gazetarin e Nacionales, Vullnet Krasniqi.
Hoxhë Musliu pretendon që gazetari i Nacionales nuk është sulmuar.
Ai ka bërë thirrje ndaj “policëve” dhe “miletit” që të mos i prekin siç i ka quajtur ai gazetarët “klerikët modern”.
Sulm / Një muaj paraburgim për personin që sulmoi gazetarin Vullnet Krasniqi në Prizren
Hoxha gjithashtu ka bërë një pretendim se kinse sulmuesit po shkojnë në burg për një “prekje apo një fjali”.
“Kujdes…, O POLICË dhe “O MILET” mos i prekni “KLERIKET MODERN” sepse rrezkoheni me suspendim dhe me burg… per një prekje apo fjali 30 ditë!” – ka shkruar Musliu në profilin e tij në Facebook.
Ndërkohë, Gjykata Themelore në Prizren, ka caktuar masën e paraburgimit ndaj personit që sulmoi gazetarin, Vullnet Krasniqi.
“Gjykata me rastin e caktimit të masës së paraburgimit ndaj të pandehurit ka vlerësuar se ekzistojnë arsyet ligjore për caktimin e masës së paraburgimit, dhe nga provat e mbledhura deri në këtë fazë, rrjedh dyshimi i bazuar se: I pandehuri A.K., me datë 11 gusht 2023, rreth orës 14:00., në Prizren, me dashje e sulmon personin zyrtar në lidhje me detyrat e tij zyrtare – të dëmtuarin V.K., (gazetar), në atë mënyrë që në momentin kur i dëmtuari V.K., (gazetar), gjatë kryerjes së detyrës së tij merr në intervistë të pandehurin, ky i fundit A.K., e shtyen me dorë duke e sulmuar, pasta, i dëmtuari V.K., vazhdon ti intervistojë protestuesit të tjerë të pranishëm ku has në rezistencë, të të pranishmëve, dhe persona të tjerë e sulmojnë fizikisht gazetarin me të cilat veprime tek i njëjti shkaktojnë shqetësim.” – thuhet ndër të tjera në njoftimin e Gjykatës Themelore të Prizrenit.
