Deputetja e LDK-së, e zgjedhur për herë të shtatë në Kuvend, thotë se votat janë përgjegjësi e madhe dhe premton angazhim të pandalur për demokracinë dhe shtetin e së drejtës.
Deputetja e Lidhjes Demokratike të Kosovës, Hykmete Bajrami, ka falënderuar publikisht qytetarët pas përfundimit të procesit të numërimit të votave, duke theksuar se 57 mijë e 153 vota të fituara personalisht janë dëshmi e besimit të madh të qytetarëve ndaj saj.
banner
Ajo bëri të ditur se në zgjedhjet e fundit LDK-ja ka marrë gjithsej 126 mijë e 102 vota, ndërsa përkrahja që ajo ka marrë e bën deputete për herë të shtatë në Kuvendin e Republikës së Kosovës.
“Votat për mua nuk janë vetëm shifër, por mirënjohje e thellë për punën që kam bërë dhe përgjegjësi e madhe për të vazhduar me të njëjtin përkushtim, ndershmëri dhe guxim”, tha Bajrami.
Ajo theksoi se gjatë mandateve të kaluara ka punuar vazhdimisht kundër korrupsionit, për transparencë, llogaridhënie dhe mbrojtje të interesit publik, duke shtuar se kjo betejë nuk ka përfunduar. Sipas saj, sot më shumë se kurrë propaganda, korrupsioni dhe përpjekjet për rrënimin e demokracisë po rrezikojnë themelet e shtetit.
“Do të vazhdoj të jem zëri i qytetarëve, pa kompromis dhe pa frikë. Do të punoj çdo ditë për të vërtetën, sepse vetëm ajo na bashkon dhe na çon përpara”, u shpreh Bajrami.
Deputetja e LDK-së foli edhe për situatën brenda partisë, duke theksuar se dorëzimi nuk është opsion. Ajo tha se rezultati i zgjedhjeve është përgjegjësi dhe mësim për të gjithë, ndërsa bëri thirrje për ringritjen dhe rikthimin e LDK-së.
“LDK duhet dhe do të rikthehet e para, me punë, me besim dhe me ekip, duke e vendosur gjithmonë Kosovën mbi çdo interes partiak”, përfundoi ajo.
