Lajmi për vdekjen në moshë të re të inxhinierit e ekspertit të inxhinierisë, Ali Ahmeti, ka tronditur jo vetëm Mitrovicën por edhe më gjerë, për shkak të veprimtarisë së tij atdhetare, raporton Gazeta Online Veriu.info.
Ahmeti veprimtarinë atdhetare e kishte filluar qysh në moshë të re, duke qenë pjese e unionit studentor dhe organizator i protestave studentore të 1997-tës në Mitrovicë.
Atë e ka kujtuar edhe kryetari i atëhershëm i Unionit Studentor, tash profesor universitar, Bujar Dugolli.
Dugolli e ka cilësuar Ahmetin si burrë të pathyeshëm e të vendosur.
“ Ai ishte shembull i një aktivisti të madh e të përkushtuar në punë e me sjellje shembull për të gjithë ne.” – ka shkruar Dugolli ndër të tjera.
Postimi i plotë:
Sot morëm lajmin për ndarjen nga jeta të shokut të çmuar e të dashur, Ali Ahmeti.
Aliun e kam njohur që nga koha e Lëvizjes Studentore 97’ dhe ashtu do ta kujtojë përherë, si një burrë të vendosur, si shok besnik, patriot e atdhetar të dalluar. Ai ishte i pathyeshëm, si organizator i demonstratave studentore me 1 tetor 1997 në Mitrovicë, të cilat i organizonte atje. Ai ishte shembull i një aktivisti të madh e të përkushtuar në punë e me sjellje shembull për të gjithë ne.
Ndarja nga jeta në moshë kaq të re e Aliut, është humbje për familjen e nderuar Ahmeti, që ka dhënë kontribut të madh në luftën çlirimtare, është humbje për bashkëpunëtorët e tij, por edhe për të gjithë ne që në etapa të caktuara kohore e njohëm dhe mbajtëm të pashuar respektin për të.
I përjetshëm do të jetë kujtimi për shokun tonë Ali Ahmeti.
B.D.
