Drejtori Ekzekutiv i Asociacionit të Komunave të Kosovës, Sazan Ibrahimi, në një intervistë në EURO n’T7 ka folur për problemet e mëdha që po kanë komunat e Kosovës për shkak të proceseve përmbarimore.
Sipas tij, shumë projekte kapitale të komunave as që po arrijnë të nisen për shkak të mungesës së mjeteve financiare.
“Vetëm këtë vit janë mbi 90 milionë euro nga vendimet gjyqësore, aty përfshihen edhe mjete të marra për shkak të kontratës kolektive. Kontrata Kolektive ka ndikuar në mënyrë të drejtpërdrejtë dhe në mënyrë indirekte. Indirekte është për shkak se nëse një komune i janë marrë mjetet për shkak të kontratës kolektive, në anën tjetër po ajo komunë ka pasur të nënshkruar kontratë me një operator ekonomik, dhe përmbaruesi ka marrë mjetet nga ajo vijë buxhetore, ku më pas operatori ekonomik është ankuar në gjykatë dhe ka fituar rastin. Tani përveçse ka fituar rastin operatori ekonomik dhe i ka marrë mjetet e veta, aty hyn tani edhe përqindja që marrin përmbaruesit dhe avokatët, e kështu buxheti i komunave po dëmtohet rëndë”, ka thënë Ibrahimi.
Në anën tjetër, në bazë të të dhënave që Ibrahimi ka prezantuar, janë mbi 300 milionë që komunave iu janë marrë nga proceset gjyqësore, kryesisht për shkak të kontratës kolektive.
“Janë mbi 380 milionë euro që iu janë marrë komunave që nga viti 2020 nga vendimet gjyqësore, ku shumica janë për shkak të kontratës kolektive. Këtu hyjnë të gjitha komunat në vend, pavarësisht se prej cilës parti politike udhëhiqen. Mbi 100 milionë euro nga këto 380 milionë euro kanë shkuar në xhepat e përmbaruesve, avokatëve dhe procedurave gjyqësore. Çfarë t’i thuash tjetër kësaj përveç gjakderdhje e pastër financiare? Këtu diçka është e organizuar”, ka thënë Ibrahimi
Këto mjete, sipas Ibrahimit, kanë pasur si destinacion investimet kapitale, mallrat e shërbimet nëpër komuna.
