Disa media vunë re se presidenti i Rusisë ka një mbresë në qafë, për këtë arsye filluan spekulimet se Vladimir Putin mund të ishte operuar për kancer.
Një mbresë u vu re në qafën e presidentit rus, nën mjekër, gjatë fundjavës, teksa mbante një qiri në një shërbesë mesnate në Katedralen Ortodokse të Pashkëve të Moskës.
Gazeta britanike Daily Mail rikujton pretendimet e medias së pavarur ruse Proekt, e cila deklaroi një vit më parë se lideri rus vuante nga kanceri i tiroides. Gjithashtu thuhet se kjo mbresë duket qartë në videot dhe fotot e publikuara nga Kremlini nga shërbimi i Pashkëve, por jo gjithmonë duket.
Pavarësisht pretendimeve, nuk ka asnjë provë që 70-vjeçari iu nënshtrua një operacioni për të hequr gjëndrën tiroide, e cila mund të ketë përfshirë një prerje në pjesën e përparme të qafës.
Ndryshe, Putin gjatë një vizite në rajonet e pushtuara ukrainase shihet duke çaluar teksa del prej një veture për tu takuar me disa ushtarakë. /Telegrafi
