Rëndësia e afatit të produkteve është thelbësore për funksionalitetin e tyre. Zakonisht jemi mësuar të spikasin produktet ushqimore pa afat, por në esencë thuajse secili produkt ka afatin e përdorimit, përfshirë edhe produktet sanitare.
Në publik Creative Ceramika prezantohet si kompani që ofron produkte cilësore të qeramikës, sanitarisë, laminatit dhe dyerve. Por realiteti te Creative Ceramika me bazë në Gjilan duket pa më ndryshe, pasi që Inspektorati Qendror i Mbikëqyrjes së Tregut ka zbuluar në këtë kompani produkte pa afat.
Veriu.info ka siguruar një vendim të IQMT-së të Ministrisë së Tregtisë me të cilën kompanisë Creative Ceramika me pronar Lulzim Bajrami i është sekuestruar malli për shkak të mungesës së afatit të tij.
Në arsyetimin e vendimit bëhet e ditur se muajin e kaluar është realizuar një vizitë inspektuese në Creative Ceramika, gjatë së cilës është hasur në produktin Flex Silicone Ceresit me afat të skaduar.
Me këtë rast inspektorati ka sekuestruar 43 copë Flexsilicone Ceresit.
“Produktet e tilla me afat të skaduar janë të pasigurta për vendosje në treg, sepse mund të paraqesin rrezik për përdorim, dhe si të tilla u sekuestruan në sasi prej 43 copë”, thuhet në arsyetimin e vendimit të IQMT-së të siguruar nga Veriu.info.
Veriu.info ka tentuar të marrë një qëndrim nga “Creative Ceramika” Sh.P.K. për këtë vendim të Inspektoratit Qendror të Mbikëqyrjes së Tregut, por deri në momentin e publikimit të artikullit nuk ka pranuar përgjigje për pyetjet e dërguara.
Foto kryesore e artikullit: Ilustrim
