Kompania e Telekomunikimit “IPKO” ka humbur betejën ligjore në Gjykatën Kushtetuese ndaj komunës së Hanit të Elezit për një tarifë komunale prej 1 mijë eurosh. Kushtetuesja e deklaroi të papranueshme kërkesëne e IPKO-s për vlerësimin e kushtetutshmërisë së aktgjykimit të kontestuar të Gjykatës Supreme, përmes të cilit pretendohej se i janë shkelur të drejtat dhe liritë themelore të garantuara me Kushtetutë dhe Konventën Evropiane për të Drejtat e Njeriut.
Sa i përket aspektit kronologjik, në vendimin e Kushtetueses të marrë më 25 shkurt 2026, thuhet se bazuar në shkresat e lëndës, IPKO me leje nga Drejtoria e Urbanizmit në Komunën e Hanit të Elezit kishte vendosur dy antena- njërën në zonën kadastrale Pustenikë dhe tjetrën në një parcelë në zonën kadastrale Dimcë, raporton “Betimi për Drejtësi“.
Në vendim thuhet se më 12 tetor 2018, Drejtoria për Shërbime Publike dhe Emergjencë në Komunën e Hanit të Elezit, e obligoi IPKO-n që të paguajë 1 mijë euro për vendosjen e antenave në pikat ekzistuese, si kusht për vazhdimin e qëndrimit të tyre.
11 ditë pas, IPKO kishte parashtruar ankesë në Komunë me pretendimin se vendimi ishte i paligjshëm dhe kishte propozuar shfuqizimin e tij.
Më 9 nëntor 2018, Bordi Komunal për Ankesa dhe Parashtresa në Komunën e Hanit të Elezit e refuzoi ankesën e parashtruesit, duke arsyetuar se tarifa e vendosur për antenat përbën taksë vjetore mbi pronën, e bazuar në rregulloren komunale për taksa dhe tarifa.
Në vendim thuhet se sipas kësaj rregulloreje, për çdo antenë duhej të paguhej shuma prej 500 euro.
“…leja për vendosjen e transmetuesve (antenave) me frekuenca të ndryshme dhe objekte tjera të ngjashme për nevojat e telefonisë fikse mobile dhe televizioni, internet e të tjera të ngjashme, paguhet taksa vjetore ( nga vlera e llogaritur e objektit)”, citohet rregullorja në fjalë në vendimin e Kushtetueses.
Ndërkaq, thuht se më 3 dhjetor 2018, IPKO inicioi konflikt administrativ duke e kundërshtuar vendimin, me pretendimin se kjo pagesë ishte në fakt tatim i tërthortë mbi pronën dhe në kundërshtim me Ligjin për Komunikimet Elektronike dhe Postare, i cili i përjashton pajisjet e telekomunikacionit nga tatimi në pronë. Madje, IPKO pretendoi se parcelat në fjalë janë pronë private, për çka ata paguajnë qira e po ashtu edhe pronarët paguajnë tatim në pronë.
Kështu, IPKO ka pretenduar se Komuna e Hanit të Elezit ka vendosur taksë të dyfishtë.
“…e me qenë se antenat në fshatrat Dimcë dhe Pustenikë janë të vendosura në pronë private për të cilat paditësi paguan qira kurse pronarët e tokave paguajnë tatim në pronë, taksa e vendosur nga i padituri paraqet taksë të dyfishtë e imponuar në mënyrë arbitrare”, theksohet në vendimin e Kushtetueses se këtë parashtrim në Themelore e ka bërë IPKO.
