Ish-Kryeministri i Kosovës, Isa Mustafa, konsideron se ata që e kërkojnë kthimin e Presidentes Vjosa Osmani në Lidhjen Demokratike të Kosovës, më së paku janë eksponentë të LDK-së, duke theksuar se ata shumë më shumë janë eksponentë të Vetëvendosjes brenda LDK-së.
Këto komente, Mustafa i ka bërë në një prononcim për VOX Kosova, pasi që është pyetur për të komentuar qëndrimet e disa zyrtarëve të LDK-së për rikthimin e Osmanit në LDK, pas prishjes së raporteve të saj me Vetëvendosjen.
“Do thosha që ata që kërkojnë kthimin e Vjosës në LDK, më së paku janë eksponentë të LDK-së. Shumë më shumë janë eksponentë të VV-së të ndenjur në LDK”, tha ish-Kryetari i LDK-së për VOX-in.
Pasi që Vetëvendosja nuk e kandidoi edhe për një mandat si Presidente Vjosa Osmanin, edhe pse ajo kishte shprehur publikisht ambiciet edhe për një mandat në krye të shtetit, disa eksponentë të LDK-së u shprehën të gatshëm që ta pranonin rikthimin e Osmanit në LDK.
“LDK është shtëpi e madhe”, tha Shefja e Grupit Parlamentar të LDK-së, Jehona Lushaku Sadriu, më 4 mars, kur u pyet për rikthimin e mundshëm të Osmanit dhe nëse e njëjta do të bëhej pjesë e listës së LDK-së në zgjedhjet e ardhshme.
Osmani ishte larguar nga LDK-ja në vitin 2021. Ajo kishte themeluar një iniciativë të quajtur Lista GUXO, në fillim të vitit 2021. Me këtë iniciativë, Osmani kishte bërë koalicion me Albin Kurtin, duke u bërë pjesë e listës së VV-së në zgjedhjet e 14 shkurtit 2021.
Në ato zgjedhje, Osmani kishte garuar për Presidente, ndërsa Kurti për Kryeministër. Pas fitores me mbi 50 për qind, binomi kishte marrë të dy pozitat.
Humbjen më të madhe në zgjedhjet e 2021-së do ta kishte LDK-ja. Kjo parti do të merrte rezultatin më të dobët në histori, rreth 13 për qind.
Për shkak të këtij rezultati të dobët, Isa Mustafa kishte dhënë dorëheqje nga drejtimi i LDK-së.
Osmani ka pasur pozita kyçe në LDK. Madje, në zgjedhjet e 6 tetorit 2019, ajo ishte mandatuar nga partia si kandidate për Kryeministre.
Në ato zgjedhje, Osmani ishte renditur e dyta, pas Kurtit.
Për shkak të marrëveshjes për bashkëqeverisje me VV-në, Osmani do të zgjidhej Kryetare e Parlamentit.
Çarja e Osmanit me LDK-në kishte filluar kur ajo kishte dalur kundër prishjes së koalicionit me VV-në, pasi që Albin Kurti, si Kryeministër, e kishte shkarkuar Agim Veliun e LDK-së nga pozita e Ministrit të Punëve të Brendshme, në kundërshtim me marrëveshjen për bashkëqeverisje.
Pas rrëzimit të Qeverisë Kurti, Osmani kishte dalur kundër formimit të Qeverisë së re nga bashkëpartiaku i saj, Avdullah Hoti.
