Ish-kryeministri Isa Mustafa, në një intervistë për Klankosova.tv, ka komentuar situatën aktuale politike në vend, duke u ndalur veçanërisht te dështimi i zgjedhjes së Kryetarit të Kuvendit dhe sfidat që po përballet Lëvizja Vetëvendosje pas zgjedhjeve të fundit.
Mustafa vlerëson se moszgjidhja e kryeparlamentarit dhe ngërçi institucional janë pasojë e pakënaqësisë së Vetëvendosjes me rezultatin zgjedhor, si dhe përpjekjes së saj për të fituar kohë në funksion të gjetjes së një formule të re të qeverisjes ose për të shkuar sërish në zgjedhje.
Ai thekson se propozimi i Albulena Haxhiut për kryetare të Kuvendit nuk duhet të bëhet pengesë për formimin e institucioneve, duke apeluar që të gjendet një zgjidhje politike gjithëpërfshirëse.
Mustafa vlerëson për klankosova.tv gjithashtu se heshtja e kryeministrit në detyrë Albin Kurti në këto rrethana është e papranueshme, duke kërkuar nga ai marrjen e përgjegjësisë politike dhe komunikimin e qartë me qytetarët.
Në këtë situatë të tensionuar, sipas Mustafës, edhe partitë opozitare dhe Presidentja e Republikës kanë rol të rëndësishëm për të nxitur dialogun dhe kapërcimin e bllokadës politike.
Si e komentoni dështimin e Albulena Haxhiut për t’u zgjedhur Kryetare e Kuvendit 5 herë radhazi dhe a mendoni se ky dështim është rezultat i një plasaritjeje më të thellë politike?
Isa Mustafa: Vlerësoj se VV nuk është e kënaqur me rezultatet e zgjedhjeve dhe po blenë kohë për të gjetur një zgjidhje për të bërë një qeveri që asaj do t’i konvenonte ose për të shkuar në zgjedhje të reja.
A mendoni që Albulena Haxhiu është propozimi i duhur për kryeparlamentare dhe nëse jo kush mendoni se do të ishte emër i pranueshëm?
Isa Mustafa: Partia që doli e para në zgjedhje, në këtë rast LVV, ka të drejtë të propozojë çdo deputet të saj por edhe të subjekteve të tjera për kryetar të Kuvendit. Nuk i jap vetes të drejtë të them se kush do të ishte kandidati i qëlluar. Por veprim i qëlluar do të ishte të mos bllokohet propozimi në një emër të cilin nuk po e votojnë deputetët e subjekteve, të cilat më parë ishin në opozitë. Mund të gaboj, por më duket se kjo situatë momentalisht po iu konvenen të gjithëve, sepse askush, përveç deklaratave, nuk po ka guxim të sfidohet me qeverisjen.
Po heshtjen e Albin Kurti, si e vlerësoni dhe a mendoni se duhet të ale e të flasë para qytetarëve për situatën e krijuar?
Isa Mustafa: Albin Kurti në kuptimin e plotë të fjalës po del të jetë negacion i vetëvetes. Ai po e bënë çdo gjë, të cilën e ka sulmuar dhe kritikuar. Por, jashtë këtij vlerësimi, i takon të informojë qytetarët dhe votuesit e tij të shumtë se cila është zgjidhja që i ofron Kosovës. Liderit i takon të marrë vendime dhe t’i bëjë publike. Të marrë edhe riskun e vendimeve të tij.
A shihni ndonjë rrezik që Kosova të shkojë sërish në zgjedhje për shkak të pamundësisë për të konstituuar Kuvendin?
Isa Mustafa: Zgjedhjet i shoh si alternativë. Jo si rrezik. Rreziku iu takon partive, ato duhet të maten. Por ka hapësirë që subjektet politike të ulen bashkërisht dhe t’i ofrojnë zgjidhje vendit. Të heqin dorë nga deklaratat që pamundësojnë bashkëpunim.
Edhe në të kaluarën nuk jemi pajtuar ndërmjet veti, por kemi komunikuar, kemi krijuar hapësirë dhe kushte të bisedojmë, pa marrë parasysh epilogun.
Si e vlerësoni pozicionin që kanë marrë partitë opozitare dhe a po luajnë rol konstruktiv, apo po përfitojnë nga ”kaosi”?
Isa Mustafa: Në këtë situatë asnjë parti nuk është në pozitë dhe as në opozitë. Shanset për ta bërë qeverinë i kanë përafërsisht të njëjta, hezitimin e kanë, po ashtu, përafërsisht të njëjtë. Nuk shoh përfitime të askujt nga kjo situatë kaosi, siç po e definoni ju. S’mund të përfitojë asnjë parti nëse vendi dëmtohet.
Si e shihni rolin dhe qëndrimin që ka mbajtur Presidentja Vjosa Osmani gjatë kësaj situate politike dhe a ka përgjegjësi të veçantë për ta ndihmuar kapërcimin e bllokadës?
Isa Mustafa: Presidentja do duhej të punojë për të gjetur rrugëdalje. Situata, veçmas te zgjedhja e kryeparlamentarit, sa i përket zgjidhjes që e ka dhënë Gjykata Kushtetuese në vitin 2014 mund të zvarritet në pafundësi. Nga kjo situatë dilet me zgjidhje politike e jo me norma juridike. S’mund të flas se cili është autoriteti i presidentes tek subjektet politike tani, duke e pasur parasysh se ajo ka qenë tepër e lidhur me VV-në deri në fund të vitit të kaluar. Por do duhej të heqë dorë nga shetitjet dhe të merret me punët e shtëpisë.
