Data 18 e këtij muaji është caktuar si datë zyrtare për mbajtjen e zgjedhjeve në komunat me shumicë serbe.
Serbët po kundërshtojnë mbajtjen e zgjedhjeve në këtë pjesë të vendit, dhe si pasojë nga data 6 maj atje kanë ndodhur disa incidente.
E tensionet mund të shtohen nëse nuk shtyhen zgjedhjet.
Kështu tha për Front Online, ish-kryetari i Mitrovicës së Jugut, Avni Kastrati.
“Mendoj që për zgjedhjet në veri nuk ka me pasë kushte për me u mbajt zgjedhjet, tjetër është që ne dëshirojmë, por momenti nuk është adekuat për me i mbajt ato zgjedhje sepse komuniteti shumicë që jeton në pjesën veriore dhe në ato tri komunat tjera është i diktum prej Beogradit, dhe sigurisht ka me dhënë sugjerim që mos me dalë në zgjedhje. Dhe s’ka me pasë zgjedhje të mira, në kuptim të asaj që me qenë ndërkombëtarisht të pranume”, i shpreh Kastrati për Front Online.
Për tensionet në veri të vendit, Kastrati thotë erdhën si pasojë e veprimeve të pamatura të Qeverisë së Republikës së Kosovës.
“Mendoj se janë bërë veprime të pamatura prej anës tonë, prej Qeverisë së Republikës së Kosovës. Është dashur që para se të fillonte një veprim, me e ditë qysh ka me përfundu. Nëse s’dihet qysh ka me përfundu, atëherë duhet me bë analiza shtesë edhe me gjet varianten më të mirë të mundshme. Kështu që tani jemi në një situatë të pa lakmueshme”, deklaroi Kastrati.
Përshkallëzimin e situatës atje nuk e përjashton ish-kryetari Kastrati.
Ai thotë se Beogradi do të ndikojë në komunitetin serb.
“Unë mendoj se mundet me ardh deri te përshkallëzimi për arsye se diktati nga Beogradi ka mi shty komunitetin serb në veri me qenë agresiv edhe mos me leju me u mbajt zgjedhjet”, tha ai për Front Online.
Zgjedhjet e jashtëzakonshme në katër komunat e banuara me shumicë serbe – Mitrovicë e Veriut, Zubin Potok, Leposaviq e Zveçan, janë caktuar të mbahen më 18 dhjetor.
Ambasadori i Shteteve të Bashkuara në Kosovë, Jeffrey Hovenier, tha se, aktualisht, nuk ka kushte për mbajtjen e zgjedhjeve në këtë datë.
Më 6 dhjetor, grupe të qytetarëve serbë në veri penguan hapjen e zyrave të Komisionit Qendror të Zgjedhjeve, duke shkaktuar incidente me armë zjarri dhe granata.
