Ish-ministri i Shëndetësisë, Armend Zemaj duke folur për “Front Online” ka kritikuar ashpër gjendjen në sektorin e shëndetësisë, duke akuzuar Qeverinë për keqmenaxhim dhe mungesë të investimeve në shërbimet shëndetësore.
Sipas Zemajt, gjendja në shëndetësi është degraduar si pasojë e paaftësisë së ekzekutivit dhe interesave të lidhura me “mafian farmaceutike”.
“Gjendje degradimi, e thënë nga ne vazhdimisht se kjo qeveri ka qenë e paaftë dhe vetëm në interes të mafisë farmaceutike, e jo të avancimit të shërbimeve shëndetësore në vendin tonë”, deklaroi Zemaj.
Ai tha se problemet në sistemin shëndetësor po shtohen nga dita në ditë, duke përmendur mungesën e barnave dhe kushteve bazë.
“Dje pa penj e barna, sot pa gjërat më elementare dhe përditë infeksione e papastërti nga keqmenaxhimi”, u shpreh ish-ministri.
Zemaj akuzoi Qeverinë se po përpiqet të shmangë përgjegjësinë për gjendjen në sektor, duke ia faturuar fajin stafit shëndetësor.
“Vetëm këta dinë të sulmojnë stafin shëndetësor dhe të tentojnë t’i ikin përgjegjësisë së tyre”, deklaroi ai.
