A keni dëgjuar ndonjëherë për një polic që ka dhunuar të dashurën e tij, po ashtu police, ndërsa gjykata ia ka rikualifikuar veprën penale dhe në fund gjyqtari Veton Ademi i ka shqiptuar një gjobë, e cila më shumë është nënçmim për viktimën sesa drejtësi?
Ish-rreshteri në Stacionin e Policisë në Pejë, Senad Hamziç, një zyrtar i betuar për të ruajtur rendin dhe për të mbrojtur jetën e qytetarëve, më 15 maj 2022, rreth orës 03:00 të mëngjesit, ka kryer një akt të rëndë ndaj një gruaje, e cila për një periudhë kishte qenë edhe e dashura dhe kolegia e tij.
Sipas aktakuzës së Prokurorisë në Pejë, i dyshuari, në gjendje të dehur, ka shkuar me veturën e tij te një market, ku e ka marrë të dëmtuarën F.K. Pas qëndrimit në një lokal, ku ka vazhduar të konsumojë alkool, ata janë nisur me veturë.
Gjatë rrugës, një dyshim për tradhti ka shkaktuar fillimisht një përplasje verbale, e cila më pas ka eskaluar në dhunë fizike. Brenda veturës, ish polici e ka shtyrë viktimën, ndërsa pasi ajo ka dalë jashtë, ai e ka ndjekur.
Ai e ka goditur me shkelm në kofshë, e ka kapur për krahu dhe e ka tërhequr me forcë drejt veturës, ku e ka sulmuar me grushte dhe shuplaka në fytyrë dhe kokë. Edhe pasi ajo ka rënë në tokë, dhuna ka vazhduar me goditje në pjesë të ndryshme të trupit.
Si pasojë e goditjeve, viktimës i është shkaktuar gjakderdhje nga hunda. Në një moment, ajo ka arritur të largohet, por i dënuari tashmë nga gjykata, e ka ndjekur sërish, e ka kapur për flokësh dhe e ka tërhequr zvarrë, për ta futur me forcë në veturë dhe për t’u larguar nga vendi i ngjarjes.
Sipas aktakuzës, viktima ka pësuar lëndime të lehta trupore, përfshirë dëmtime në kokë dhe trup, si dhe në krahun e majtë, të shoqëruara me gjakderdhje nënlëkurore.
Ndonëse Hamziç nuk e ka pranuar fajin, gjykata ka vërtetuar se ai ka kryer veprën penale dhe e ka dënuar me 3 mijë euro gjobë, duke ia llogaritur edhe ditët e kaluara në arrest shtëpiak. Ai ka qëndruar në arrest shtëpiak nga 15 maji 2022 deri më 9 qershor të po atij viti, gjithsej 25 ditë. Nëse një ditë në arrest shumëzohet me 20 euro, sipas aktgjykimit ai do të paguante rreth 2.500 euro për gjithë periudhën.
F.K., e pakënaqur me vendimin, është ankuar në Gjykatën e Apelit. Në seancë, Hamziç e ka pranuar veprën për të cilën është dënuar.
Gjyqatri në Gjykatën Themelore në Pejë, Veton Ademi, vendimin e tij e ka arsyetur kështu:
Si rrethana lehtësuese janë marrë parasysh sjellja e tij gjatë seancave gjyqësore, fakti që është kryefamiljar dhe i papunë, si dhe që nuk ka qenë më parë i dënuar për vepra penale.
Megjithatë, mbetet e diskutueshme fakti se gjykata nuk ka marrë parasysh që në kohën e kryerjes së veprës ai ka qenë polic, pra një person që duhej të njihte dhe respektonte ligjin.
Insajderi ka monitoruar edhe seancën gjyqësore në Gjykatën Themelore në Pejë. Megjithatë, ajo nuk ka zgjatur shumë, pasi gjyqtari Ademi ka vendosur që mediat të mos marrin pjesë në seancë. Kjo pasi është pranuar kërkesa e avokatit të të akuzuarit dhe e prokurores së rastit, të cilët kanë vlerësuar se publikimi mediatik nuk i konvenon të akuzuarit.
