Ish-presidenti francez Nicolas Sarkozy hyri në një burg në Paris të martën, në ditën e parë të një dënimi pesëvjeçar, duke shënuar herën e parë që një ish-udhëheqës i Francës moderne kalon kohë pas hekurave, shkruan CNN.
Sarkozy u dërgua në kompleksin e burgut të martën në mëngjes, duke përshëndetur mbështetësit e tij teksa largohej nga shtëpia.
Makina që e transportonte atë ishte e rrethuar nga dhjetëra motoçikleta dhe automjete policie, duke ndjekur rrugën drejt burgut La Santé në jug të Parisit.
Sarkozy u dënua muajin e kaluar me pesë vjet burg për komplot kriminal, për rolin e tij në një skemë për të financuar fushatën e tij presidenciale të vitit 2007 me fonde nga Libia në këmbim të favoreve diplomatike.
Ish-presidenti, i cili u largua nga detyra në vitin 2012, synon të apelojë, por ndërkohë pritet të qëndrojë në një qeli ose në izolim të vetëm, ose në të ashtuquajturën “krahina VIP” të kompleksit të burgut La Santé.
Kjo krahinë zakonisht është e rezervuar për të burgosur që konsiderohen të papërshtatshëm për t’u mbajtur mes popullsisë së përgjithshme të burgut, zakonisht për arsye sigurie.
Ata mund të jenë politikanë, ish-policë, anëtarë të organizatave të ekstremit të djathtë ose persona të lidhur me grupe terroriste islamike, raportoi BFMTV, filiali i CNN.
Në një deklaratë të postuar në X menjëherë pasi makina që e transportonte u nis drejt burgut, Sarkozy theksoi se është një “njeri i pafajshëm”.
