Ish-kryetari i Komunës së Malishevës, Isni Kilaj, sot pritet të dalë para Gjykatës Speciale.
Dhomat e Specializuara në Hagë kanë njoftuar se seanca e parë për ish-eprorin e UÇK-së, i cili është arrestuar të enjten, pritet të fillojë në orën 10:00.
Në njoftimin për media të lëshuar dje, këto dhoma kanë treguar se seanca do të jetë publike.
“Paraqitja e parë do të jetë seancë publike, gjatë të cilës Gjykatësi i Vetëm siguron që Isni Kilaj është informuar për arsyet e arrestimit të tij dhe se po respektohen të drejtat e tij sipas Ligjit dhe Rregullores, ndër të cilat e drejta për përfaqësim juridik. Brenda 48 orësh pas paraqitjes së parë, Gjykatësi do të vendosë në lidhje me mbajtjen e mëtejshme në paraburgim ose lirimin e Isni Kilajt”, është thënë në njoftim.
Nder të tjera, janë treguar edhe arsyet e arrestimit të Kilajt.
“Urdhri për arrestimin e Isni Kilajt u lëshua nga Prokurorja e Specializuar për vepra penale kundër administrimit të drejtësisë, përfshirë pengim të personave zyrtarë në kryerjen e detyrave zyrtare sipas nenit 401 të Kodit Penal të Kosovës të vitit 2019, kodi nr. 06/L-074 (KPK) dhe shkelje të fshehtësisë së procedures sipas nenit 392 të KPK-së, dhe neneve 15(2) dhe 16(3) të Ligjit nr.05/L-053 për Dhomat e Specializuara të Kosovës dhe Zyrën e Prokurorit të Specializuar (Ligji).”, është thënë në njoftim.
