Izraeli nuk do ta pranojë praninë e forcave të armatosura turke në Gaza si pjesë e një plani të Shteteve të Bashkuara për t’u dhënë fund luftimeve në enklavën palestineze, tha të hënën ministri i Jashtëm i Izraelit, Gideon Saar.
Plani i presidentit amerikan, Donald Trump, përfshin një forcë ndërkombëtare në Gaza për ta ndihmuar garantimin e armëpushimit të brishtë, i cili filloi muajin e kaluar, duke u dhënë fund dy vjetëve luftë mes Izraelit dhe Hamasit, raporton agjencia e lajmeve “Reuters”.
Megjithatë, mbetet e paqartë nëse vendet arabe dhe shtete e tjera do të jenë të gatshme që të angazhojnë trupa për këtë forcë ndërkombëtare. “Shtetet që dëshirojnë ose që janë të gatshme për të dërguar forca të armatosura duhet të jenë të paktën të drejta ndaj Izraelit” – tha Saar në një konferencë për gazetarë në Budapest.
Marrëdhëniet dikur të ngrohta mes Turqisë dhe Izraelit janë përkeqësuar në masë drastike gjatë luftës në Gaza. Presidenti turk, Rexhep Erdogan, e ka kritikuar ashpër fushatën shkatërruese ajrore e tokësore izraelite në enklavën e vogël palestineze.
“Turqia, e udhëhequr nga Erdogani, udhëhoqi një qasje armiqësore kundër Izraelit” – tha ministri Saar, duke folur krahas homologut hungarez, Peter Szijjarto. “Prandaj, nuk është e arsyeshme për ne që t’i lëmë forcat e tyre të armatosura që të hyjnë në Rripin e Gazës dhe ne nuk do të pajtohemi me këtë dhe ua kemi thënë këtë miqve tanë amerikanë” – shtoi ai.
Përderisa administrata e Trumpit e ka përjashtuar dërgimin e ushtarëve amerikanë në Rripin e Gazës, ajo ka zhvilluar bisedime me Indonezinë, Emiratet e Bashkuara Arabe, Egjiptin, Katarin, Turqinë dhe Azerbajxhanin për të kontribuuar në forcën shumëkombëshe.
Javën e kaluar, kryeministri izraelit, Benjamin Netanyahu, la të kuptohej se kundërshtonte fuqishëm çfarëdo roli të forcave turke të sigurisë në Gaza. Të dielën, ai tha se Izraeli do të vendosë se cilat forca të huaja do të lejohen në Gaza.
Sekretari i Shtetit i ShBA-së, Marco Rubio, gjatë një vizite në Izrael me qëllim të mbështetjes së armëpushimit, tha të premten se forca ndërkombëtare duhet të përbëhet nga “shtete me të cilat Izraeli është rehat”. Ai nuk e komentoi përfshirjen e mundshme të forcave turke.
