Kryetarit të Bordit të Bankës Qendrore të Kosovës, Bashkim Nurboja, është shndërruar në militant të partisë në pushtet. Pavarësisht postit të lartë publik që ka, ai nuk heq dorë nga mbështetja për VV-në.
Edhe pas marrjes së pozitës aktuale, ai është përfshirë në aktivitete politike duke e përkrahur partinë e tij.
Ndonëse ligji ia ndalon pjesëmarrjen në aktivitete politike, ai vazhdimisht është përfshirë në fushatë të VV-së, duke mbështetur kandidatë të caktuar të kësaj partie në zgjedhjet nacionale dhe ato lokale.
Gazeta Nacionale dje ka raportuar se vitin e kaluar Nurboja ka dhënë një mijë euro donacion për fushatën e Lëvizjes Vetëvendosje.
Këtë ai e ka deklaruar në formularin për deklarimin e pasurisë për vitin 2026.
Gjithashtu, gazeta Nacionale vitin e kaluar ka raportuar se për përfshirjen e Nurbojës në fushatën e VV-së.
Duke e “harruar” se posti i lartë publik që mban ia ndalon përfshirjen në aktivitete politike, në zgjedhjet e lokale të 12 tetorit ai kishte promovuar publikisht bashkëshorten e tij Mimoza Nurboja, që ishte kandidate e VV-së për asamble komunale në Pejë, dhe ish-kandidatin e VV-së për kryetar të Pejës, Taulant Kelmendi.
Të gjitha këto veprime ai po i bën në kundërshtim të hapur me Ligjin e Bankës Qendrore të Republikës së Kosovës.
Kjo pasi normat e këtij ligji ia ndalojnë guvernatorit dhe anëtarëve të bordit të BQK-së pjesëmarrjen në aktivitete politike.
Neni 41 të këtij ligji thotë se një anëtar i bordit mund të shkarkohet nga pozita, nëse ai ka marrë pjesë në ndonjë aktivitet politik.
“2.3. ka marrë pjesë aktive në aktivitete politike pasi që është emëruar si anëtar i Bordit të Bankës Qendrore.”, thuhet në piken 2.3 te nenit 41.
Megjithatë, deri me tani BQK-ja nuk ka marrë asnjë masë ndaj kryetarit të Bordit të Bankës Qendrore të Kosovës, Bashkim Nurboja, i cili vazhdimisht dhe në mënyrë të hapur e ka mbështetur VV-në.
Edhe para se të merrte këtë post, Bashkim Nurboja njihej si një aktivist i denjë i partisë së Albin Kurtit.
Në dekadën e fundit, ai i ka shërbyer zellshëm VV-së në pozita të ndryshme partiake.
Gjatë këtyre viteve, Nurboja ka garuar nën logon e partisë së Albin Kurtit në zgjedhje lokale dhe në zgjedhje qendrore.
Në zgjedhjet lokale të vitit 2017, Nurboja kishte garuar si kandidat i VV-së për kryetar të Komunës së Pejës. Megjithatë, qytetarët e Pejës nuk ia kishin besuar mandatin.
Më pas, ai e kishte provuar fatin edhe për zgjedhje nacionale, duke kërkuar mandat për deputet.
Në zgjedhjet nacionale të vitit 2019, ai kishte garuar për deputet në listën e VV-së. As kësaj radhe nuk ia kishte arritur qëllimit.
Pas gjithë këtyre dështimeve, VV-ja kishte vendosur të shpërblente me një post të lartë publik.
Në vitin 2021, me ardhjen e VV-së në pushtet, ai ishte zgjedhur anëtar i bordit të BQK-së. Kurse, në shkurti të vitit 2023, Bordi i Bankës Qendrore të Republikës së Kosovës e kishte zgjedhur Bashkim Nurbojën kryetar të këtij institucion.
