Ehat Miftaraj, drejtor i Institutit të Kosovës për Drejtësi (IKD), ka theksuar se keqplanifikimi dhe keqadministrimi në mungesë të përvojës apo ekspertizës në qeverisje janë disa nga shkaktarët kryesorë që kanë bërë që mbi 70 deri 80 përqind e pozitave drejtuese në nivel qendror të funksionojnë me ushtrues detyre.
Miftaraj gjithashtu ka theksuar se ndodhin edhe raste kur disa ministra me qëllim shmangin shpalljen e konkurseve për këto pozita, duke lënë mundësinë që ato të mbeten të mbushura nga persona që mund të kontrollohen lehtësisht nga politika.
“Keqplanifikimi dhe keqadministrimi në mungesë të përvojës apo ekspertizës në qeverisje nga ana e ministrive të caktuara apo institucioneve të pavarura janë ndër shkaktarët ku mbi 70 ose 80 përqind e pozitave drejtuese në nivel qendror sot funksionojnë me ushtrues detyre. Po ashtu, nuk përjashtohen rastet kur ministrat e caktuar më qëllim nuk shpallin konkurset për plotësimin e këtyre pozitave ose kur i shpallin, dështojnë në mënyrë që në këto pozita të caktohen UD, të cilët lehtë kontrollohen nga politika,” ka deklaruar Miftaraj.
Ai gjithashtu ka theksuar rëndësinë e emërimeve me konkurs për të siguruar një menaxhim të duhur dhe për të shmangur ndikimin politik në punën e institucioneve. Sipas tij, kjo është një mënyrë për të siguruar pavarësinë dhe efikasitetin në administratën shtetërore.
“Secila ministri apo institucion publik miraton dokumente strategjike lidhur me menaxhimin dhe administrimin e tyre ku përcaktohen objektiva, qëllime dhe aktivitete që duhet të përmbushen brenda afateve të caktuara kohore,” ka theksuar ai, duke shtuar se një drejtor i përgjithshëm duhet të orientojë punën e tij në përmbushjen e obligimeve ligjore dhe strategjike.
“Padyshim se kur një drejtor i përgjithshëm i një institucioni, qoftë qeveritar apo i një institucioni të pavarur që emërohet me konkurs dhe mandat të plotë, e orienton punën e tij në përmbushjen e obligimeve që dalin nga ligji dhe dokumentet strategjike për të arritur rezultatet e përcaktuara,” shtoi Miftaraj për GazetaBlic.
