Rregullorja e BQK-së që ka hyrë në fuqi nga 1 shkurti, ka ngjallur reagime të shumta.
Me anë të kësaj rregulloreje, në Kosovë valuta e vetme për kryerje të pagesave në Kosovë është euro, duke u ndaluar përdorimi i dinarit.
Kjo ka ngjallur reagim të perëndimit, derisa SHBA-të po kërkojnë që vendimi të shtyhet.
Për shkak të kësaj, ambasadorët e QUINT-it sot kanë qenë në takim me kryeministrin Albin Kurti.
Pas takimit, ambasadori amerikan, Jeffrey Hovenier, tha se ka kërkuar nga Kurti shtyrjen e vendimit të BQK-së, derisa ka thënë se kjo do të ndikojë në partneritetin Kosovë-SHBA.
Lidhur me këtë, deputetja e LDK-së, Rrezarta Krasniqi, në një prononcim për Gazeta Blic, thotë se deklaratat e SHBA-ve duhet të merren parasysh nga Qeveria dhe të ketë reflektim.
“Deklarimet e fundit nga përfaqësuesit e SHBA-së dhe BE-së që kanë për motiv vendimet e fundit të Qeverisë Kurti për mbylljen e komunave paralele dhe OJQ-ve duhet të merren me seriozitet të lartë dhe të ketë reflektim të menjëhershëm nga ky pushtet, i cili në mungesë të koordinimit me aleatët tanë po provokon tensione të reja dhe përkeqësim situate në veri të Kosovës”, shprehet ajo.
Krasniqi thekson se LDK është pro shtrirjes së sovranitetit në çdo pjesë, por veprimet e tilla duhet të koordinohen me partnerët ndërkombëtarë.
“Ne jemi pro shtrirjes së sovranitetit në çdo pjesë të territorit të vendit tonë, mirëpo veprimet e tilla duhet të bëhen në koordinim të plotë me partnerët tanë, SHBA dhe BE sidomos në këtë periudhë kohore kur gjendja duket të jetë me delikate në komunat veriore. Prandaj, po ritheksoj se duhet të ketë reflektim urgjent nga ana e Qeverisë, konform shqetësimeve të ngritura nga aleatët tanë”, deklaron deputetja e LDK-së, Rrezarta Krasniqi.
