Këshilltari i kryeministri Kurti, Jeton Zulfaj, i ka reaguar nënkryetare së PDK-së, Vlora Çitaku, të cilën e ka quajtur cinike, pas reagimit të saj se Qeveria Kurti ka dështuar në veri.
Zulfaj pretendon që Çitaku është e ngazëllyer nga veprimet e dhunëshme të grupeve kriminale në veri të vendit.
“Nuk duhet të ketë ngazëllim e as momente euforie ndaj veprimeve të dhunshme të grupeve kriminale në veri të vendit nën drejtimin e presidentit autokrat të Serbisë.”, ka shkruar ai.
Më tej, ai ka kërkuar kritikë që ka bazë dhe argument, teksa ka thënë se situata në veri është për shkak të qeverisjeve të kaluara.
“Sikur veriu të ishte integruar nuk do të kishim këtë situatë që kemi sot. Pra, politikat e vizionin tuaj për ushtrim të sovranitetit në gjithë territorin e vendit i kemi parë.”, ka shkruar ai ndër të tjera.
Shkrimi i plotë:
Cinizmi është një lloj urtësie për keqardhje sepse ciniket janë të prirë që të interpretojnë çdo situatë si të pashpresë.
Nuk duhet të ketë ngazëllim e as momente euforie ndaj veprimeve të dhunshme të grupeve kriminale në veri të vendit nën drejtimin e presidentit autokrat të Serbisë.
Sikur veriu të ishte integruar nuk do të kishim këtë situatë që kemi sot. Pra, politikat e vizionin tuaj për ushtrim të sovranitetit në gjithë territorin e vendit i kemi parë.
Është evidente që kemi kuptime të ndryshme se çka është dështim e çka sukses jo vetëm në veri por në shumë aspekte tjera.
Por ndoshta mund të pajtohemi që kur nuk ka bazë e argumente për të kritikuar, të përmbahemi nga dëshira partiake për të shënuar poena politik në kurriz të shtetit.
Qeveria është e hapur për kritikë çdoherë, sa më shumë aq më mirë, sa më përmbajtësore aq më bindëse. Pa kritike nuk ka as përmirësim e as progres.
Nëse keni një alternativë më të mirë, (nga ajo që kemi parë nga ju për më shumë se një dekadë) për të ushtruar sovranitetin në gjithë territorin e vendit, bëni publike.
