Gazeta Sinjali ka siguruar ekskluzivisht emrat e dy zyrtarëve të lartë policorë në Pejë, ndaj të cilëve Inspektorati Policor i Kosovës ka rekomanduar suspendim të përkohshëm, për shkak të dyshimeve për keqpërdorim të pozitës apo autoritetit zyrtar.
Bëhet fjalë për Nënkolonel Negjat Gutiq dhe Kapiten Prek Tuna, të cilët janë pjesë e strukturës komanduese në Drejtorinë Rajonale të Policisë në Pejë.
Hetimi është iniciuar nga IPK pas raportimeve në media për një rast të ndodhur më 28 maj 2025, kur në rrugën “Shpëtim Bojku” kishte ndodhur një aksident trafiku, e me ç’rast ishte shoqëruar një person që nuk ishte pjesë e aksidentit, por që kishte penguar zyrtarët në kryerjen e detyrës.
Dyshohet se dy zyrtarët e lartë kishin ndërhyrë në trajtimin e këtij rasti, duke mos lejuar që të procedohej tutje për ndjekje penale dhe duke mos e njoftuar fare Prokurorinë e Shtetit. Në vend të kësaj, të dyshuarit i ishte shqiptuar një tiketë për kundërvajtje, për prishje të rendit dhe qetësisë publike, duke e mbyllur rastin jashtë procedurës së paraparë.
Pas veprimeve të para hetimore dhe në koordinim me Prokurorinë Themelore në Pejë, IPK ka rekomanduar suspendimin e përkohshëm të Gutiqit dhe Tunës, ndërkohë që hetimet për këtë rast janë në zhvillim.
Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.
