Disa zyrtarë të Qendrës Korrektuese në Gjilan kanë shpëtuar pa “ther në këmbë” pas shkaktimit të një incidenti me armë zjarri në një aheng privat.
20 gardianë të kësaj qendre ndodhen nën hetime nga Prokuroria Themelore në Gjilan për mbajtje në pronësi të paautorizuar të armëve, moslajmërim i veprës penale dhe shkaktim të rrezikut të përgjithshëm.
Ata dyshohen për gjuajtje me armë zjarri në një aheng privat në fshatin Poliçkë të Kamenicës në fillimin e këtij muaji.
Në mesin e gardianëve të përfshirë në këtë incident është edhe Zylfi Ajeti, familjar i shefit të Agjencisë Kosovare të Inteligjencës (AKI), Petrit Ajeti, ka mësuar Paparaci nga burime të mirëinformuara për ngjarjen.
Mbrëmjen e 2 qershorit, 20 gardianët e shërbimit korrektues janë mbledhur për aheng në një kullë në fshatin Poliçkë dhe kanë shtënë me armë zjarri.
Rasti është denoncuar nga një banor i fshatit, tregon një raport zyrtar për ngjarjen, të cilin e ka parë Paparaci.
Raporti tregon se një njësi patrulluese e Policisë së Kosovës, e cila doli në vendin e ngjarjes, gjeti 14 gëzhoja 9.19mm dhe dy gëzhoja të një kalibri tjetër.
Pas kontrollimit të të dyshuarve, policia gjeti tri armë zyrtare të tipit Glock dhe i sekuestroi ato me urdhër të Prokurorit të Shtetit.
Përfshirja në këtë incident, zyrtarëve të Qendrës Korrektuese në Gjilan nuk u ka bërë telashe në punë.
Përkundrazi, ata kanë shpëtuar pa “ther në këmbë”.
Shërbimi Korrektues i Kosovës (ShKK) nuk ka iniciuar asnjë procedurë disiplinore ndaj zyrtarëve të përfshirë në incident, ka thënë një burim i informuar për ngjarjen, raporton Paparaci.
Rreth dy javë pas ngjarjes, dy prej zyrtarëve të përfshirë në incident Arbnor Syla dhe Gani Dërmaku ia kanë mësyer avancimit në detyrë.
Ata janë në mesin e kandidatëve për avancim në pozitën Mbikëqyrës i Lartë në Qendrën e Paraburgimit në Gjilan, tregon një dokument zyrtar i Drejtorisë Qendrore të Shërbimit Korrektues të Kosovës, e cila udhëheq procedurat e brendshme rekrutuese.
Dokumenti tregon se tre zyrtarët e përfshirë në incidentin me armë zjarri dhe nën hetime nga Prokuroria Themelore e Gjilanit, ndodhen në listën e ngushtë për avancim në këtë pozitë.
Njoftimi për kandidatët është lëshuar më 16 qershor, raporton Paparaci.
Zyrtarët e tjerë të ShKK në Gjilan, të përfshirë në këtë incident janë: Memin Shkodra, Hamdi Kryeziu, Bafti Kerqeli, Bejtush Neziri, Refik Gerbovci, Agron Maliqi,Ferhat Rrustemi, Fadil Demaj, dhe Mentor Kryeziu.
