Anëtari i opozitës ruse Mihail Khodorkovsky ka thënë se nëse lufta në Ukrainë vazhdon, presidenti rus Vladimir Putin do të përpiqet të destabilizojë Ballkanin përmes Serbisë në mënyrë që t’ua vështirësojë jetën evropianëve dhe shtoi se Rusia ka një ndikim të madh në Austri.
“Putini mbështet radikalët e çdo lloji. Qëllimi i tij është destabilizimi në mënyrë që të mund të pozicionohet si dikush që menaxhon një situatë të paqëndrueshme. Nëse lufta vazhdon, ai do të përpiqet të destabilizojë Ballkanin, në mënyrë që t’ua vështirësojë jetën evropianëve”, ka thënë Khodorkovsky.
I pyetur nëse këtë do ta bëjë përmes Serbisë, ai u përgjigj “natyrisht”.
“Fatkeqësisht, rusët janë idiotë. Ata e provuan këtë në Mal të Zi dhe e larguan këtë vend prej tyre, humbën ndikimin në të. Por nuk mund të llogarisni gjithmonë në faktin se ata do të jenë gjithmonë idiotë. Pas sanksioneve, ndikimi i Rusisë u zvogëlua. Për shembull, në Gjermani. Por partitë e djathta janë partnerët e natyrshëm të Putinit. Ai e di këtë. Dhe meqenëse votuesit e së djathtës radikale zakonisht mbështesin Putinin, atëherë nëse fillon një luftë ai nuk e humb mbështetjen e tyre. Kjo duhet të monitorohet me kujdes”, shpjegoi Khodorkovsky për të përditshmen vjeneze “Standard”.
Ai ka theksuar se Rusia ka ndikim të madh në Austri.
“Duke pasur parasysh numrin e vrasësve profesionistë, është shumë më e lehtë për Putinin të vrasë dikë në Austri sesa në çdo vend tjetër evropian”, shpjegoi ai.
Për këtë arsye, thekson ai, gazetari bullgar Hristo Grozev kohë më parë është larguar nga Vjena për arsye sigurie.
“Ndikimi i Putinit në Austri është i madh dhe këtë e tregojnë rezultatet e Qendrës sime “Dosje”, e cila heton ndikimin e tij të paligjshëm në vendet e tjera. Nuk e di se sa do të dëshirojë Austria të luajë sërish rolin si në kohën Luftës së Ftohtë, kur Vjena, pothuajse, ishte qendra e ndërveprimit të shërbimeve të inteligjencës. Kur ishte një vend për të anashkaluar sanksionet. Për shkak të integrimit të sotëm të Evropës, nuk jam i sigurt se sa të lumtur do të ishin vendet e tjera nëse Austria do të merrte këtë rol”, ka thënë Khodorkovsky.
