Mbajtja e armëve pa leje është një dukuri që po lulëzon në të gjitha qytetet, duke e cenuar sigurinë e qytetarëve. Për një rast të tillë, të përdorimit të sprejit, që ka ndodhur mbrëmë në një lokal në rrugën “Adem Jashari” në Viti, Policia ka iniciuar rast për shkaktim të rrezikut të përgjithshëm, raporton Gazeta Sinjali.
Burimet nga Prokuroria kanë bërë me dije se bëhet fjalë për lokalin “Kolos”, ku një klient dyshohet se ka hedhur sprej, derisa ishte në tavolinë me disa persona të tjerë dhe më pas ka ikur nga vendi i ngjarjes. Për pasojë, klientët e tjerë që ndodheshin në kafeteri kanë filluar të mos ndihen mirë dhe janë larguar nga lokali.
Ndërkohë, në vendin e ngjarjes ka dalë edhe Policia, pas denoncimit të pronarit të kafeterisë, i cili i ka njoftuar për detajet e rastit, teksa ka ofruar edhe pamjet nga kamerat e sigurisë.
Rastin e ka konfirmuar edhe vet pronari, i cili në një prononcim për Sinjalin, tha se i riu bashkë me personin tjetër që kanë qenë bashkë në momentin kur e ka përdorur sprejin është paraqitur më vonë në lokal dhe ka kërkuar falje. Sipas tij, ata nuk kanë pasur qëllim të keq.
Lidhur me rastin, me urdhër të Prokurorit të Shtetit, ndaj të dyshuarit është iniciuar rasti për shkaktim të rrezikut të përgjithshëm dhe mbajtje në pronësi, kontroll ose posedim të paautorizuar të armëve”.
