Kompania “A.R.F. SH.P.K” është shpërblyer me tender nga Policia e Kosovës. Kjo kompani, që ishte dënuar nga vetë Gjykata Themelore në Prishtinë, tani do ta furnizojë Policinë e Kosovës me materiale për hetimin në vend të ngjarjes, shkruan Insajderi.
Policia e Kosovës ka njoftuar në e-prokurim se ka dhënë një kontratë për “FURNIZIM ME MATERIAL SHPENZUES PËR HETIMIN NË VENDIN E NGJARJES”.
Kompanisë që iu besua tenderi është “A.R.F. SH.P.K” me vlerë 86 mijë euro.
Në garë ishte edhe një kompani tjetër që ofertoi më lirë.
“A.R.F. SH.P.K” kishte përfituar edhe më parë nga Policia e Kosovës.
Kompania ishte rekomanduar për kontratën “Furnizim me blloka ‘vendime për kundërvajtje’ dhe ‘raporti i aksidentit’”, në një aktivitet të prokurimit të udhëhequr nga Policia e Kosovës.
Vlera e ofertës së kompanisë së rekomanduar për kontratë ishte 306,300.00 euro. Edhe në këtë tender kishin ofertuar kompani me çmim më të lirë, por Policia i ka ‘injoruar’.
Mashtrimi me tender dhe dënimi nga Gjykata
Në vitin 2024, Gjykata e Apelit e ka vërtetuar vendimin e Gjykatës Themelore në Gjilan, e cila e ka dënuar pronarin e kompanisë “A.R.F.”, pasi është vërtetuar se ai kishte falsifikuar një dokument për të fituar një tender në Komunën e Gjilanit, me vlerë 155 mijë euro.
Fillimisht, gjykata e ka dënuar me 1 mijë euro gjobë dhe 180 ditë burgim, por me kërkesë të të dënuarit burgimi është zëvendësuar me 4 mijë euro gjobë, duke arritur në total një dënim prej 5 mijë euro.
Bëhet fjalë për të dënuarin Avdi Koca, i cili gjatë ngritjes së aktakuzës kishte vendosur të heqë dorë nga aksionet në kompani, duke i zhvendosur ato te familjari i tij, Resmi Koca.
Prokuroria kishte ndaluar atë për shkak të veprës penale ‘’Keqpërdorimi dhe Mashtrimi në Prokurim Publik’’, nga neni 415 paragrafi 3 të Kodit Penal të Republikës së Kosovës.
I njëjti dyshohet se ka falsifikuar një dokument zyrtar të lëshuar kinse nga Ministria e Forcës së Sigurisë (Ministria e Mbrojtjes), me të cilin dokument ka aplikuar në një tender publik në vitin 2021, në Komunën e Gjilanit dhe e ka fituar të njëjtin.
Me këto referenca i dyshuari kishte aplikuar në Komunën e Gjilanit në tenderin e lartshënuar duke fituar dhe firmosur kontratën me komunën e Gjilanit në vlerën e 155 mijë eurove.
Ligji i Prokurimit Publik ndalon pjesëmarrjen e kompanisë në tenderë për dhjetë vite në rast të dënimit nga një gjykatë kompetente, edhe nëse pronari është ndërruar. Megjithatë, kjo nuk ka penguar “A.R.F. SH.P.K.” të marrë tendera nga Policia e Kosovës./GazetaInsajderi/
