Pas publikimit të artikullit të djeshëm nga portali Veriu.info ku tregoj se si komuna e Mitrovicës ka nënshkruar kontratë për asfaltimin e rugës “Lah Nimani” në vlerë prej 892,453,40 euro, anipse kjo rrugë ka gjatësi vetëm 394 metra, ku ndër të tjera në bazë të kësaj kontratë do të paguaj 92,609.40 euro vetëm për matje gjeodezike të kësaj rruge kogja të shkurtër.
Në reagimin qesharak të komunës së Mitrovicës lajmi i publikuar nga Veriu.info quhet dezinforues, përkundër që nuk mohohet se vlera e kësaj rrugë prej vetëm 394 metra rrugë do të kushtoj afër 900 mijë euro, kontratë e cila mbanë nënshkrimin e krytarit të komunës së Mitrovicës, Bedri Hamza (shih dokumentin e mëposhtëm).
Po ashtu në asnjë pjesë të reagimit nuk mohohet fakti se për matje të ndryshme gjeodezike të kësaj rrugë do të paguhen 92,609.40 euro, përafërsisht aq sa kushton 1 km asfalt në rrugët e fshatrave/lokale.
Në linkun e mëposhtëm gjeni artikulline detajuar të publikuar dje nga Veriu.info, ku mund ta krahasoni me reagimin e komunës, se cila palë ka të drejt:
Komuna e Mitrovicës po ashtu nuk e ka mohuar faktin se kontrata e nënshkruar nga kryetari Bedri Hamza, në tender ishte parashikuar të kushtojë 600 mijë euro, por që kyetari ka pranuar të nënshkruaj kontratën me vlerë 48% më të lartë se sa çmimi i parashikuar, ani pse ekziston mundësia ligjore e anulimit të tenderit kur gjitha ofertat e përgjegjshme janë mbi vlerën e prashikuar të tenderit.
Reagimi i plotë i komunës së Mitrovicës:
Reagim për lajmin dezinformues rreth tenderit – ndërtimi i rrugës “LAH NIMANI”- Mitrovicë
Ditën e enjte me datë 23.02.2023 është publikuar një lajm i pavërtetë në lidhje me kontratën e ndërtimit të rrugës “LAH NIMANI”, në Mitrovicë.
Shkrimi i lartpërmendur ka qenë plotësisht i pabazuar dhe nuk ka pasur asnjë mbështetje në gjendjen faktike apo në ndonjë provë, me të cilën do të konstatohej një fakt i tillë.
Qytetarët e Mitrovicës i njoftojmë që të gjitha procedurat e prokurimit kanë qenë të hapura, transparente dhe janë publikuar në mënyrë elektronike, me datën 29.06.2022, me numër të Prokurimit: 642 – 22 – 6315 – 5-1-1 dhe janë respektuar me përpikëri të gjitha procedurat e LPP-së dhe gjithashtu janë respektuar rekomandimet të cilat i ka parashtruar Organi Shqyrtues i Prokurimit dhe Autoriteti Kontraktues ka bërë përmirësimet e duhura sipas këtyre rekomandimeve.
Në hapjen publike të ofertave kanë ofertuar gjithsej 4 Operator Ekonomik, prej tyre Operatori Ekonomik në çmimin më të ulët është diskualifikuar për shkak të mos plotësimit të kritereve të tenderit, ku Autoriteti Kontraktues i ka respektuar të gjitha nenet e LPP-se dhe ka kërkuar informata shtesë sipas nenit 59 dhe 72 të LPP-së për operatorin me çmimin më të ulet, me ç ‘rast operatori në fjalë ka kthyer përgjigje, mirëpo përgjigjja e tij nuk i ka përmbushur kërkesat të cilat i ka parashtruar Autoriteti Kontraktues.
Pas përfundimit të procedurave të prokurimit, janë kërkuar dokumentet nga Operatori Ekonomik sipas nenit 65 të LPP-së, ku Operatori Ekonomik i shpërblyer me kontratë i ka dorëzuar të gjitha dokumentet valide sipas këtij neni dhe garancionin bankar për ekzekutimin e tenderit.
Para nënshkrimit të kontratës, Autoriteti Kontraktues e ka plotësuar deklaratën shtesë të nevojave në vlerën e përcaktuar sipas kontratës, ku me datën 24.11.2022 është nënshkruar kontrata me OE me ofertën me çmimin më të lirë e cila ka vlerën reale të projektit: 892,453.40 €.
Për një transparencë më të plotë lidhur me tenderin në fjalë, Komuna e Mitrovicës, është e hapur edhe për pranimin e të gjitha Kërkesave për Qasje në Dokumente Publike, për të vërtetuar ligjshmërinë e tërë procesit.
