Analisti politik, Sabri Ramabaja, ka theksuar nevojën që Kosova të ndërmarrë reforma të thella në organizimin e saj administrativ, duke marrë shembull modelin e Shqipërisë.
Sipas tij, kjo do t’i jepte fund një qarku të mbyllur politik dhe institucional në të cilin ndodhet vendi.
“Informacione konkrete nuk kam, por fakti që po punohet mbi këtë ide tregon se ka vullnet për të dalë nga ky qark i mbyllur. Kosova ka nevojë për një sistem të organizimit të brendshëm të ngjashëm me Shqipërinë — të ketë bashkësi, prefekturë dhe një organizim tjetër të pushtetit lokal,” tha Ramabaja në emisionin Debat Plus.
Ai shtoi se ky model do të mundësonte një riorganizim më funksional edhe të komunave në pjesën veriore dhe lindore të vendit.
“Kryetari i ardhshëm i Mitrovicës mund të përfshijë tërë veriun, ose ai i Gjilanit të mbulojë edhe Anamoravën,” u shpreh ai.
Në lidhje me zhvillimet politike dhe zgjedhjet e ardhshme, Ramabaja parashikoi një garë të fortë mes dy partive kryesore, Vetëvendosjes dhe Partisë Demokratike të Kosovës (PDK).
“Atyre që më së shumti iu konvenon shkuarja në zgjedhje janë Vetëvendosja dhe PDK-ja. Me gjakftohtësi, këto dy parti do të jenë fitueset më të mëdha, duke marrë më shumë deputetë,” vlerësoi ai.
Për Lidhjen Demokratike të Kosovës (LDK), Ramabaja nuk parashikoi rezultate pozitive.
“LDK do të përjetojë humbje në këto zgjedhje,” përfundoi ai.
