Deficiti tregtar i Kosovës me Italinë është thelluar edhe më shumë gjatë vitit 2025, si pasojë e rritjes së importeve dhe rënies së vazhdueshme të eksporteve. Importet nga Italia kanë arritur në 369.4 milionë euro, ndërsa eksportet kanë zbritur në vetëm 28.9 milionë.
Shkëmbimet tregtare ndërmjet Kosovës dhe Italisë po bëhen gjithnjë e më të pabarabarta. Publikimi i Odës Ekonomike të Kosovës, i bazuar në të dhënat e Agjencisë së Statistikave të Kosovës tregon se gjatë vitit 2025 importet nga Italia kanë vazhduar të rriten, ndërsa eksportet e Kosovës kanë shënuar rënie të ndjeshme, duke e çuar deficitin tregtar në 340.5 milionë euro, niveli më i lartë i viteve të fundit.
Sipas raportit, gjatë vitit 2025 Kosova eksportoi në Itali mallra në vlerë prej 28.9 milionë euro, ndërsa importoi produkte italiane në vlerë prej 369.4 milionë euro.
Si rezultat, bilanci tregtar mbeti thellësisht negativ, me një deficit prej 340.5 milionë euro, që paraqet një rritje prej 16 për qind krahasuar me vitin 2024, kur deficiti ishte 293.5 milionë euro.
Raporti evidenton se eksportet drejt Italisë kanë pësuar një rënie të fortë prej 22.7 për qind në krahasim me vitin paraprak. Në vitin 2024 eksportet ishin 37.4 milionë euro, ndërsa një vit më vonë ranë në 28.9 milionë euro. Në të kundërtën, importet nga Italia u rritën me 11.6 për qind, duke kaluar nga 330.9 milionë euro në vitin 2024 në 369.4 milionë euro në vitin 2025.
Oda Ekonomike, duke iu referuar statistikave të ASK-së, thekson se kjo pabarazi ka bërë që mbulueshmëria e importeve me eksporte të bjerë në vetëm 7.8 për qind, niveli më i ulët i regjistruar në katër vitet e fundit. Për krahasim, kjo shkallë ishte 16.8 për qind në vitin 2022, 13.4 për qind në vitin 2023 dhe 11.3 për qind në vitin 2024, duke dëshmuar për një përkeqësim të vazhdueshëm të pozitës eksportuese të Kosovës.
Analiza e Odës Ekonomike tregon se gjatë periudhës 2022-2025, eksportet e Kosovës drejt Italisë kanë pasur një trend rënës me një mesatare vjetore prej 16.2 për qind, ndërsa importet janë rritur mesatarisht me 7.8 për qind në vit. Sipas raportit, importet nga Italia dominojnë dukshëm ndaj eksporteve, duke reflektuar varësinë relativisht të madhe të tregut kosovar nga produktet italiane.
Në vitin 2025, eksportet në Itali përbënin vetëm 3.1 për qind të eksportit të përgjithshëm të Kosovës, duke e renditur Italinë në vendin e dhjetë në mesin e destinacioneve kryesore të eksporteve kosovare. Ndërkohë, importet nga Italia përfaqësonin 5.2 për qind të importeve totale, duke e bërë Italinë partnerin e pestë më të madh importues të Kosovës.
Të dhënat nëpër vite tregojnë se importet nga Italia kanë ndjekur një trend të vazhdueshëm rritës.
Nga 185.8 milionë euro në vitin 2020, ato u rritën në 275.1 milionë euro në vitin 2021, 275.9 milionë euro në vitin 2022, 287.5 milionë euro në vitin 2023, 330.9 milionë euro në vitin 2024 dhe arritën në 369.4 milionë euro në vitin 2025.
Nga ana tjetër, eksportet kanë lëvizur në drejtim të kundërt. Pas kulmit prej 59.7 milionë eurosh në vitin 2021, ato ranë në 46.4 milionë euro në vitin 2022, 38.7 milionë euro në vitin 2023, 37.4 milionë euro në vitin 2024 dhe vetëm 28.9 milionë euro në vitin 2025.
Raporti analizon edhe strukturën e importeve nga Italia. Pjesën më të madhe e zënë makineritë, pajisjet mekanike dhe elektrike, të cilat përfaqësojnë 17.1 për qind të importeve totale. Pas tyre renditen ushqimet e përgatitura, pijet dhe duhani me 16.5 për qind, produktet minerale me 12.5 për qind, produktet e industrisë kimike me 12 për qind, produktet bimore me 8.6 për qind, mjetet e transportit me 8.4 për qind dhe metalet bazë dhe artikujt prej tyre me 6.4 për qind.
Sipas Odës Ekonomike, rritja e importeve prej rreth 38.5 milionë eurosh gjatë vitit 2025 është ndikuar kryesisht nga zgjerimi i importeve të produkteve minerale, të cilat u rritën nga 9 për qind në 12.5 për qind të strukturës së importeve, nga mjetet e transportit që u rritën nga 5.6 për qind në 8.4 për qind, si dhe nga produktet bimore, të cilat shënuan një rritje nga 7.4 për qind në 8.6 për qind.
Në raport theksohet gjithashtu se sektori i ushqimeve të përgatitura, pijeve dhe duhanit vazhdon të jetë një nga segmentet më të rëndësishme të shkëmbimit tregtar mes dy vendeve, duke zënë 19.5 për qind të eksporteve dhe 16.5 për qind të importeve gjatë vitit 2025.
Sipas Odës Ekonomike të Kosovës, trendet e viteve të fundit tregojnë një thellim të vazhdueshëm të deficitit tregtar me Italinë dhe një varësi të konsiderueshme të ekonomisë së Kosovës nga produktet italiane. /Monitor
