Ministri i Mbrojtjes së Kosovës, Ejup Maqedonci, gjatë një vizite zyrtare në Shtetet e Bashkuara të Amerikës, ka zhvilluar një takim të nivelit të lartë në Departamentin e Mbrojtjes të ShBA-së, duke hapur një kapitull të ri të bashkëpunimit në fushën e mbrojtjes dhe sigurisë ndërmjet dy vendeve.
Së bashku me Komandantin e FSK-së, Gjenerallejtënant Bashkim Jashari, delegacioni kosovar është pritur nga Zëvendës Ndihmës Sekretari për NATO dhe Evropë, z. David Baker, dhe delegacioni i tij.
“Në këtë periudhë sfiduese për paqen dhe sigurinë rajonale e ndërkombëtare, ritheksuam zotimin tonë për të përmbyllur me sukses fazën e tretë të Planit Gjithpërfshirës të Tranzicionit të FSK-së,” theksoi ministri Maqedonci.
Gjatë takimit u diskutuan prioritetet e bashkëpunimit dypalësh, ambienti strategjik i sigurisë në Ballkanin Perëndimor dhe përtej tij, si dhe hapat për zhvillimin e industrisë së mbrojtjes së Kosovës, përmes programeve dhe projekteve të përbashkëta me SHBA-në.
Ministri Maqedonci vlerësoi rolin kyç të ShBA-së në ndërtimin e kapaciteteve mbrojtëse të Republikës së Kosovës, duke e cilësuar këtë shtet si partnerin strategjik më të rëndësishëm të vendit.
