Agjencia ndërkombëtare e lajmeve, Reuters i ka kushtuar një artikull Lulzim Hetemit, kryetarit të Komunës së Leposaviqit, i cili tash e gjashtë muaj qëndron i ngujuar brenda objektit komunal.
Lulzim Hetemi, ka jetuar dhe fjetur në zyrën e tij një muaj pasi u zgjodh kryetar në zgjedhjet e muajit prill, derisa ruhet nga trupat e NATO-s dhe policia speciale e Kosovës.
Menjëherë pasi Hetemi bëri betimin e tij, ai tha se protestuesit e dhunshëm serbë e rrethuan zyrën e tij duke i kërkuar që të largohej, shkruan Reuters.
Hetemi ka refuzuar të largohet dhe thotë se ka qëndruar në ndërtesë që nga 29 maji pa u kthyer në shtëpinë e tij për asnjë ditë.
“Kush ka qejf të qëndrojë në zyrë dhe të flejë në karrige?”, tha Hetemi duke përshkruar ditët e para të izolimit.
“Kur kandidova për kryetar komune nuk e kisha idenë nëse serbët do të tërhiqen nga gara zgjedhore dhe do të bëjnë një manovër të tillë siç e bënë”.
Më vonë ai gjeti një shtrat për të zëvendësuar karriget dhe fle në një dhomë ngjitur me zyrën e tij, ku takohet me të dërguar ndërkombëtarë dhe zyrtarë të NATO-s, të cilët po përpiqen të parandalojnë dhunën dhe të gjejnë një zgjidhje për zgjedhje të reja.
Kostumet e tij të punës varen në një mur dhe aty ka edhe tri tjegulla me mjaltë sipër një tavoline, njëra pothuajse bosh, raporton Reuters.
Ish-stafi komunal në Leposaviq kanë refuzuar t’i shërbejnë kryetarit shqiptar dhe janë zëvendësuar nga 75 punëtorë të tjerë, të cilët janë po ashtu serbë.
Hetemi tha se kishte qenë i kujdesshëm që të mos prekte asgjë që i përkiste administratës së mëparshme, përfshirë disa dhjetëra shishe me pije alkoolike.
“Ne nuk kemi prekur asgjë, as pijet e tyre, librat, flamujt e Serbisë dhe as pikturat e tyre,” tha Hetemi, duke treguar tre kuti me flamuj serb dhe simbole të tjera.
“Kur do të kthehen ata do të gjejnë gjithçka siç ishin kur u larguan sepse ne nuk duam të shkatërrojmë asgjë.”
Jashtë, ushtarët amerikanë të cilët thanë se ishin nga Teksasi dhe janë pjesë e forcës së NATO-s në Kosovë, po hanin mëngjes. Hetemi, duke i parë nga kati i tretë, del çdo ditë në një tarracë për të marrë ajër të pastër dhe për të parë qytetin.
Hetemi tha se është i gatshëm të përfundojë mandatin e tij kur të shpallen zgjedhjet e reja, por ende nuk ka marrëveshje për këtë në negociatat e ndërmjetësuara nga BE-ja mes Kosovës dhe Serbisë.
