Targat, vizat e njohja e pasaportave të Kosovës nga ana e Spanjës janë disa nga ngjarjet me të cilat Qeveria e Kosovës po mburret në fillimin e këtij viti.
Madje, për njohjen e pasaportave nga ana e Spanjës meritat iu atribuan Gani Jakupit.
Por, me këto nuk pajtohet opozita.
Deputetja e LDK-së, Rrezarta Krasniqi, në një prononcim për Gazeta Blic, thotë se më së paku merita për vizat ka Qeveria Kurti, derisa është rastësi që ka ndodhur në këtë qeveri, sikurse edhe vendimi i Spanjës për pasaportat kosovare.
“Sa i takon çështjes së liberalizimit të vizave, më së paku ka merita në këtë proces të stërzgjatur nga BE, Qeveria Kurti sepse kriteret e përcaktuara për lëvizje të lirë veç ishin arritur kohë me parë, ndërkaq është rastësi që ajo kanë ndodhur për gjatë kësaj periudhë kohore, njëjtë sikurse edhe vendimi i Spanjës për njohjen e pasaportës së Kosovës”, thotë ajo.
Krasniqi e quan hipokrizi që thonë se është meritë e kësaj qeverie, derisa VV është fajtore për vonimin e liberalizimit të vizave.
“Është hipokrizi të thuash se është meritë e kësaj qeverie një rezultat i tillë. Për të vetmin gjë që kanë meritë në këtë proces partia në pushtet me Kryeministrin Kurti, është vonesa e liberalizimit të vizave, përderisa ishte kundërshtar i marrëveshjeve që ishin kusht për lëvizje të lirë. Arritje dhe meritë e kësaj qeverie do të ishte sjellja e ndonjë njohje të re për pavarësinë e Kosovës apo anëtarësim në organizata ndërkombëtare, por nuk ka ndodhur asnjëra e as tjetra, të cilat varen direkt nga puna e tyre”, vlerëson deputetja.
Krasniqi shton se Qeveria duke mos pasur rezultate, po tenton të manipulojnë qytetarët duke përvetësuar meritat që nuk i takojnë.
“Nuk e di sa mund të ketë qenë befasi kur vetë fakti se BE kishte vendosur për heqjen e liberalizimit të vizave për Kosovës është nënkuptuar se do të hapen dyert për qytetarët e vendit në të gjitha vendet e zonës shengen, pra që janë në kuadër të BE-së e pjesë e saj është edhe Spanja, pra është një proces zinxhiror i cili ka për motiv vendimin e BE-së dhe jo punën e kësaj qeverie, sepse e thash edhe më lart, puna e tyre do të shihej në rastin e njohjeve apo anëtarësimeve, por fatkeqësisht nuk ka ndodhur asnjëra e as tjetra, e në mungesë të rezultateve këta tentojnë që në çdo rast të manipulojnë qytetarët duke përvetësuar meritat edhe në raste kur nuk ju takojnë”, deklaron Rrezarta Krasniqi.
