Kryeministri në detyrë, Albin Kurti, ka vazhduar me takimet konsultative me partitë parlamentare të komuniteteve joshumicë për formimin e Qeverisë së re.
Ai ka pritur në zyrë deputetin e zgjedhur nga radhët e komunitetit rom, Kryetarin e Partisë së Romëve të Bashkuar të Kosovës (PREBK), Albert Kinolli.
Në njoftimin e lëshuar nga ZKM thuhet se të dy theksuan rëndësinë e formimit të qeverisë me kohë dhe pa vonesa, dhe gatishmërinë për bashkëpunim.
“Gjatë bisedës, kryeministri veçoi promovimin dhe fasilitimin e punësimit përmes Agjencisë së Punësimit, bursat e studimit për nxënësit dhe studentët rom dhe qendrat mësimore, si dhe mbështetjen në projektet për kulturë dhe rini, si rezultate të drejtpërdrejta dhe dëshmi e përkushtimit të qeverisë për mirëqenie dhe zhvillim të gjithmbarshëm, nga i cili përfitojnë të gjitha komunitetet pa dallim”, përfundon njoftimi.
