Kryeministrja e Danimarkës, Mette Frederiksen, ka thënë se nuk do të sprapset para kërkesave të presidentit amerikan, Donald Trump, në lidhje me synimin e tij për ta marrë nën kontroll Grenlandën.
“Unë sigurisht se nuk do ta braktis Grenlandën, e mora këtë vendim para një kohe të gjatë si kryeministre daneze” – tha ajo para gazetarëve në Kopenhagë, raporton agjencia e lajmeve “Reuters”.
“Presidenti amerikan fatkeqësisht nuk e ka përjashtuar përdorimin e forcës ushtarake dhe, prandaj, pjesa tjetër prej nesh gjithashtu nuk mund ta përjashtojë atë, pra kjo është një pasojë e natyrshme e asaj që presidenti amerikan e ka thënë dhe që nuk e ka thënë” – shtoi zonja Frederiksen.
Sipas presidentit të Lituanisë, Gitanas nauseda, i cili foli në Forumin Ekonomik Botëror që po mbahet në Davos të Zvicrës, një marrëveshje për ndarjen e përgjegjësisë për sigurinë e Arktikut dhe Atlantikut të Veriut do të mund të ofronte një zgjidhje për përplasjen mes aleatëve.
Gjithashtu duke folur në Davos, kryeministri i Kanadasë, Mark Carney, tha se vendi i tij fuqishëm e kundërshton vendosjen e ndonjë takse amerikane që lidhet me çështjen e Grenlandës.
Udhëheqësit evropianë dolën në skenë në Davos në përpjekje për ta paraqitur fuqinë e kontinentit, edhe pse nuk ishte menjëherë e qartë se si do të kundërpërgjigjej në fund Bashkimi Evropian, thekson agjencia “Reuters”.
Presidenti i Francës, Emmanuel Macron, tha se Bashkimi Evropian nuk duhet të përkulet para “ligjit të më të fortit”.
“Ne besojmë se kemi nevojë për më shumë rritje, na duhet më shumë stabilitet në botë, por ne e parapëlqejmë respektin mbi bullizuesit” – tha Macroni në një takim në Davos.
