Kryeministri i Kosovës, Albin Kurti, ka deklaruar se plani i zbatimit të propozimit evropian mbase nuk duhet të diskutohet vetëm në Ohër.
Duke folur para gazetarëve pas edicionit të dhjetë të “Javës së Gruas”, Kurti është shprehur optimist se do të ketë dakordim mes palëve në takimin e Ohrit, më 18 mars.
Kurtit i është kërkuar ta komentojë edhe deklaratën e të deleguarit të Bashkimit Evropian për dialogun, Miroslav Lajçak, se pa formimin e Asociacionit të Komunave me Shumicë Serbe nuk ka marrëveshje mes dy vendeve.
“Asociacioni është në pikën e 10 të planit evropian. E kuptoj që Serbia shtynë shumë për çështjen e Asociacionit, ajo është nën nenin 10. Kur kam shikuar së fundmi, del që nga 2 korriku 2011 deri më 25 gusht 2015, janë 39 marrëveshje dhe Asociacioni përbën gjashtë pikat e para të një marrëveshje 15 pikëshe e cila është e 16 prej 39 marrëveshjeve”.
“Plani i zbatimit duhet të diskutohet në Ohër, e mbase jo vetëm në Ohër. Unë jam optimist, mirëpo tash se a do të ketë sukses a nuk do të ketë sukses, ju e dini shumë mirë që nuk varet vetëm prej meje. Unë kam, ofruar që edhe në 27 shkurt ta nënshkruajmë marrëveshjen. Nëse ka pasur mossukses asnjëherë nuk ka qenë për fajin tim sepse unë kam qenë i përkushtuar, konstruktiv dhe kreativ”, ka thënë Kurti./AlbanianPost
