Albulena Haxhiu është emri i Lëvizjes Vetëvendosje për kryetare të Kuvendit, që duket se nuk do ta ndërrojnë, pavarësisht dy dështimeve për t’u zgjedhur.
Se ajo do të jetë e propozuar edhe në seancën e nesërme e konfirmoi për Gazeta Blic edhe deputeti i zgjedhur i VV-së, Mefail Bajqinovci.
“Presim që opozita të reflektojë dhe të votohet kandidati ynë i propozuar ditë më parë për Kryetar të Kuvendit”, tha Bajqinovci.
Ndërsa, nga partitë tjera LDK, PDK e AAK janë shprehur se nuk kanë ndryshuar qëndrim lidhur me mos votimin e Haxhiut për kryekuvendare.
Por, çka mund të pritet nga seanca e nesërme, tentativa e pestë për konstituim të Kuvendit?
Lidhur me këtë, ish diplomati Avni Arifi, në një prononcim për Gazeta Blic, thotë se VV nuk dëshiron ta ndërrojë kandidatin, pasi nuk i ka numrat për formim të Qeverisë.
Sipas tij, Kurti dëshiron t’i ikë 15 ditëshit për formim të qeverisë.
“LVV nuk e ka ndërmend ta ndërrojë kandidatin sepse nuk duket se i ka numrat për formim të Qeverisë. Duke e mbajtur kuvendin e bllokuar, Kurti po i ikë 15 ditëshit kur duhet të krijojë qeverinë e në ndërkohë po përpiqet që tërësisht në kurriz të shtetit dhe qytetarëve të detyrojë deputetët e ish opozitës të votojnë kundër bindjeve të tyre”, theksoi ai.
Arifi potencon se ish opozita u tregua e hapur që të bisedojë me VV-në për një kandidat më të pranueshëm.
“Ish opozita u tregua e hapur që të bisedojë me VV-në dhe konform vendimit të Gjykatës Kushtetuese të gjejnë kandidat të pranueshëm por si duket VV insiston që qëllimet e saj kadrovike t’i realizojë me votën e deputetëve tjerë kundër vullnetit të tyre politik”, deklaroi Avni Arifi.
Ndërsa, analistja politike, Magbule Shkodra, për Gazeta Blic thotë se nëse Haxhiu është sërish kandidate, s’mund të priten rezultate të reja me të njëjtat rrethana.
“LVV pasi që ka deklaruar se Albulena Haxhiu do të jetë përsëri kandidate për kryetare të Kuvendit dhe nëse VV s’ka arritur ndonjë marrëveshje me ndonjë deputet apo parti të Kuvendit, shumë e thjeshtë, të provohet me të njëjtën mënyrë me të njëjtat rrethana, nuk mund të priten rezultate të reja përpos ndërprerje të seancës. Shpresoj që nesër z.Dehari t’i respektojë rregullat që të mos e ndërpresë seancën por ta hedh propozimin në votim dhe të dihet se sa vota janë. Pra, kjo është gjendja për momentin dhe përderisa VV nuk bën ndonjë marrëveshje me ndonjë deputet apo parti në parlament dhe nëse nuk e ndryshon kandidaten dhe të bëjë propozim të ri në vend të saj”, ka theksuar ajo.
Shkodra e ka përshëndetur propozimin e AAK-së për dy emra të tjerë të mundshëm që do t’i votonte, për çka thotë se VV duhet të diskutojë për një emër më të pranueshëm.
“Është për t’u përshëndetur që AAK ka bërë dy propozime, dy emra për të cilët ka shprehur mbështetje dhe nëse VV dëshiron ta zhbllokojë Kuvendin duhet t’i marrë parasysh propozimet apo të propozojë kandidat tjetër që është më i pranueshëm dhe do të mund të votohej, në mënyrë që të zhbllokohet situata e konstituimit të Kuvendit”, ka vlerësuar analistja.
Se sa mund të zgjasë bllokada dhe si duhet vepruar, Shkodra thotë se partitë mund t’i drejtohen presidentes dhe ajo Gjykatës Kushtetuese, për shkak të situatës së bllokimit të formimit të institucioneve.
“Nuk e di edhe sa mund të zgjasë por po besoj që nuk do të mund të zgjasë edhe shumë dhe besoj që përfaqësuesit e partive politike të takojnë presidenten, ta njoftojnë për së afërmi për situatën dhe shpresoj që presidentja të ketë mundësi të formulojë një kërkesë për Gjykatën Kushtetuese duke e bërë qëllimin kryesor të kërkesës së kemi bllokadë në krijimin e institucioneve të Republikës së Kosovës, prandaj nevojitet ndihma e Gjykatës Kushtetuese. Këtë po e them sepse në të kaluarën ka një vendim ku Gjykata Kushtetuese thotë se nuk do të përzihet në procedurat e brendshme të Kuvendit, si kjo situatë që kemi por dallimi këtu është se janë bllokuar të gjitha institucionet e Kosovës, është bllokuar krijimi i Kuvendit të Kosovës dhe më tutje nuk ka mundësi të vazhdohet edhe në krijimin e qeverisë”, ka deklaruar Magbule Shkodra
