Kryeministri i Republikës së Kosovës, Albin Kurti, ka deklaruar se është munduar me mish e me shpirt për të arritur marrëveshjen për mbajtjen e zgjedhjeve serbe me 3 prill dhe i vjen keq që kjo nuk ka ndodhur.
Në një intervistë në RTK, kryeministri Kurti ka sqaruar arsyet se pse nuk u bë kjo marrëveshje, përkundër faktit që siç shprehet, është përkushtuar shumë.
“Në të gjitha bisedimet që janë zhvilluar qoftë në Bruksel, qoftë nëpërmjet faktorëve ndërkombëtarë të Bashkimit Europian apo të QUINT-it që ka ndërmjetësuar, unë kam qenë i përkushtuar për marrëveshje, kam qenë konstruktiv në qasje dhe kam qenë kreativ në ide. Në rastin e fundit të zgjedhjeve të paralajmëruara të Serbisë për datën 3 prill ne i kemi kërkuar që të ketë një marrëveshje paraprake në bazë të së cilës do të mund të mbaheshin ato zgjedhje edhe në Republikën e Kosovës, unë e kuptoj që ka qytetarë të Kosovës që e kanë edhe nënshtetësinë e Serbisë, duan të votojnë në zgjedhjet e Serbisë, mirëpo kjo është e mundshme pasi të kemi një marrëveshje mes Kosovës dhe Serbisë.Për t’u bërë ajo marrëveshje, letrën e kërkesës për mbajtjen e zgjedhjeve ne si Qeveri e Kosovës e presim nga Qeveria e Republikës së Serbisë, pra ai i cili është i interesuar për një gjë e bën kërkesën dhe kur ne pranojmë kërkesën dhe jemi dakord bëhet marrëveshja”, tha Kurti mbrëmë në RTK, transmeton Gazeta Express.
Kurti thotë se komunikimi normal duhet të zhvillohet qeveri me qeveri.
“Kemi thënë që zyrat ndërlidhëse në Prishtinë dhe Beograd do të mund të shfrytëzoheshin si kanale logjistike të komunikimit. Mirëpo komunikimi normal duhet të jetë qeveri me qeveri”, u shpreh Kurti.
I pyetur se çfarë kërkoi QUIN-ti, kryeministri Kurti tha se ua ka shpejguar se Serbia po tregohet destruktive në disa dimenisone.
“Kërkoi marrëveshje, edhe ata janë të pajtimit që duhet të ekzitojë njëfarë dakordimi i të dy palëve. Unë fillimisht nuk jam pajtuar me mënyrën se si zyra e Qeverisë së Serbisë për Kosovën i shkruajnë OSBE-së në Kosovë, pra nuk i shkruajn Qeveria e Serbisë OSBE-së në Kosovë por i shkruan ajo zyrë, sepse dëshirojnë të thonë që kjo është OSBE në Kosovë që është në Serbi. Nuk mund të kërkojë askush prej meje që unë të mos e njoh Republikën e Kosovës, pavarësinë e vendit. Unë jam kryeministër i Kosovës spese Kosova është Republikë e pavarur. Ai ishte propozim si një letër që na e dërgon Serbia neve, por jo qeveria qeverisë, por zyrtari ndërlidhës zyrtarit ndërlidhës në të cilën thuhet se Serbia kërkon nga Kosova. Mirëpo thelbi është ky që Serbia kërkon nga Kosova, vetëm nëse Kosova thotë po, ajo letër nuk bëhet valide pa thënë Kosova po”, u shpreh tutje kryeministri.
Kurti tha se regjistrat civil të votimeve nuk janë të Kosovës por të Serbisë.
“Unë ua kam shpejguar vendeve anëtare të QUINT-it që Serbia po tregohet destruktive në shumë dimensione, teksa dëshiron që këtë çështje ta kryej me shkëmbim letrash, ndërmjet zyrtarëve ndërlidhës që i bie pak a shumë të kthehemi te viti 2020. E para është destruktive në faktin që regjistrat civil, të cilave ajo ju referohet për votime, nuk janë regjistra civil të Kosovës, por janë regjistra civil të Serbisë, ku qytetari i Graçanicës konsiderohet qytetar në Serbi dhe strukturat ilegale të komunave paralele, e bejnë evidentimin dhe mundësojnë votimin e qytetarëve serb. Pra, OSBE i mbledh kutitë, por regjistrat civil nuk janë të tyre”, u shpreh më tej ai.
Kurti u shpreh se për arritjen e marrëveshjes është munduar me mish e me shpirt, por se një gjë e tillë nuk ka ndodhur.
“Unë e di se vendet e BE-së dhe QUINT-it më kanë kritikuar, e di që janë angazhuar sinqerisht për ta gjetur një zgjidhje por mua më vjen shumë keq që nuk e kemi gjetur një zgjidhje. Unë jam munduar me mish e me shpirt që të jem shumë aktiv në bisedime për marrëveshje, nuk e kemi arritur, jemi ku jemi, nuk kemi çfarë të bëjmë. Por unë nuk pata mundësi ta ndjek deklarimin e presidentit të Serbisë pas mbledhjes së Këshillit të Sigurisë, sepse isha në ZOOM me tre kongresistë amerikanë”, tha tutje ai.
